ރޯދަމަހަށް މަޑުޖައްސާލުމަށްފަހު ހުޅުމާލެ ހިޔާ ފްލެޓް ސަރަހައްދުގައި ހުރި ގާޑިޔާތައް ނެގުމުގެ މަސައްކަތް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އިން ފަށައިފިއެވެ.
ހިޔާ ސަރަޙައްދުގައި ގަވައިދާއި ޚިލާފަށް ކާބޯތަކެތި ވިއްކުމުގެ ޚިދުމަތް ދިނުން ހުއްޓާލުމަށް އެޗްޑީސީން މިދިޔަމަހު ކުރި އިއުލާނެއްގައިވަނީ އަންގައިފައެވެ. އެޗްޑީސީން މިގޮތަށް އަންގާފައިވަނީ، އެ ސަރަޙައްދަކީ ކޮންސްޓްރަކްޝަން ސައިޓުތައް ގިނަ ސަރަޙައްދަށް ވުމާއެކު، ކާބޯތަކެތި ގެންގުޅުމުގައި ހުންނަންޖެހޭ ރައްކާތެރިކަމުގެ މިންގަނޑަށް ހުރަސްއެޅޭތީކަމަށް އެކޯޕަރޭޝަނުން ބުނެއެވެ.
އެޗްޑީސީން ބުނީ ކޮންސްޓްރަކްޝަން މަސައްކަތް ކުރުމާއި، ކާބޯތަކެތީގެ ޚިދުމަތް ދިނުމުގައި ހުންނަންޖެހޭ ސާފުތާހިރުކަމުގެ މިންގަނޑުތައް ދައްވެފައި، މިފަދަ ތަންތަނުގައި ދޭ ޚިދުމަތުގެ ސަބަބުން ބަލިމަޑުކަމެއް ފެތުރިދާނެކަމުގެ ޝަކުވާ ލިބެމުންދާކަމަށެވެ. އެގޮތުން މިފަދަ ޚިދުމަތްތައް ދެމުންދަނީ ކަމާބެހޭ އިދާރާތަކުން ނަގަންޖެހޭ ހުއްދަތައް ނުނަގާ ކަނޑައަޅާފައިވާ ޤަވާއިދުތަކާވެސް ޚިލާފަށްކަމަށް އެކޯޕަރޭޝަނުން ބުނެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެޗްޑީސީން ވިދާޅުވީ، ހިޔާ ފްލެޓް ސަރަހައްދުގައި ހުރި ގާޑިޔާތައް ނެގުމުގެ މަސައްކަތް ރޯދަމަހުގެ ތެރޭގައި މަޑުޖައްސާލާފައި އަނެއްކާވެސް އެމަސައްކަތް މިހާރު ކުރިއަށްދާކަމަށެވެ. އަދި އެ ސަރަހައްދު ހުސްކުރުމަށްފަހު މިކަމަށް ދާއިމީ ހައްލެއް ހޯދުމުގެ މަސައްކަތް މިހާރު ކުރިއަށްދާކަމަށް އެޗްޑީސީން ވިދާޅުވިއެވެ.
ހުޅުމާލޭގެ ހިޔާ ފްލެޓް ސަރަޙައްދަށް މީހުން ބަދަލުވާން ފެށިތާ 9 މަސް ވެފައިވާއިރު، އެތަނުގައި ޚިދުމަތް ދެމުންދަނީ ވަރަށް މަދު ފިހާރައަކުންނެވެ.
އެޗްޑީސީން ދަނީ ހިޔާ ސަރަޙައްދުގައި ފިހާރައާއި ކާބޯތަކެތި ވިއްކުމާއި އެކި ކަހަލަ ވިޔަފާރިތަކަށް ސްލޮޓްތައް ދޫކުރަމުންނެވެ. އެގޮތުން ރޯދަމަހާއި ދިމާކޮށް އެ ސަރަޙައްދުގައި ވަގުތީ ލޯކަލް މާރުކޭޓު ހަދައި، މާރުކޭޓުން ގޮޅިވެސް ވަނީ ދޫކޮށްފައެވެ. މިވަގުތީ މާރުކޭޓުގައި 19 ގޮޅި ހިމެނޭއިރު، މިގޮޅިތަކުގެ ޙިދުމަތްތައް މިހާރުވެސް އަންނަނީ އެ ސަރަހައްދުގައި ދިރިއުޅޭ ފަރާތްތަކަށް ލިބެމުންނެވެ.
އެޗް.ޑީ.ސީން މި ވަގުތީ މާރުކޭޓު ޚާއްސަކޮށްފައިވަނީ ސީދާ ހިޔާ ފްލެޓްތަކުގައި ދިރިއުޅޭ ފަރާތްތަކަށެވެ. މިއީވެސް އެ ސަރަޙައްދުގައި ޤަވާއިދާ ޚިލާފަށް ވިޔަފާރިކުރުން ހުއްޓުވުމަށް އެ ކޯރޕަރޭޝަނުން އެޅި ފިޔަވަޅެކެވެ.