އެމްޑީޕީގެ ޗެއަރޕާސަންކަމަށް ވާދަކުރައްވާ ނާކާމިޔާބީވެވަޑައިގެންނެވި އިމްތިޔާޒް ފަހުމީ ބަލިޤަބޫލުކުރައްވާ، އިންތިޚާބު ކާމިޔާބުކުރެއްވި އިކޮނޮމިކް މިނިސްޓަރ ފައްޔާޟް އިސްމާޢީލަށް މަރުޙަބާ ވިދާޅުވެއްޖެއެވެ.
އެމްޑީޕީން މިހާތަނަށް ބޭއްވި އެންމެ ވާދަވެރި އެއް އިންތިޚާބު އިކޮނޮމިކް މިނިސްޓަރ ފައްޔާޟް އިސްމާޢީލް ކާމިޔާބުކުރެއްވީ 58 އިންސައްތަ ވޯޓް ހޯއްދަވައިގެންނެވެ. ފައްޔާޟާއި ވާދަކުރެއްވި އިމްތިޔާޒް ފަހްމީއަށް ލިބިވަޑައިގަތީ 42 އިންސަައްތަ ވޯޓެވެ.
އިންތިޚާބަށްފަހު އިމްތިޔާޒު މިއަދު ކުރެއްވި ޓްވީޓެއްގައި ވަނީ މިނިސްޓަރ ފައްޔާޟަށް މަރުހަބާ ވިދާޅުވެފައެވެ. އިމްތިޔާޒް ވިދާޅުވީ ނިމިދިޔަ އިންތިޚާބުގައި އެމަނިކުފާނާއެކު މަސައްކަތްކޮށް ވޯޓުދެއްވި އެންމެހާ މެމްބަރުންނަށް ހިތުގެ ފުނުން ޝުކުރުވެރިވާކަމަށެވެ. އަދި މިވީހާ ދުވަހު ނަގަހައްޓަމުން އައި ހަމަތަކާ އަސާސްތަކުގައި އެމްޑީޕީއާއެކު ދެގޮތެއްނުވެ، އަބަދުވެސް ދެމިހުންނަވާނެކަމަށް ވިދާޅުވިއެވެ.
މިނިސްޓަރ ފައްޔާޒަށް މަރުހަބާ!
— ???????? ????? (@Imthiyazfahmy) May 15, 2022
ނިމިދިޔަ އިންތިޚާބުގައި އަޅުގަނޑާއެކު މަސައްކަތް ކޮށް ވޯޓުދެއްވި އެންމެހާ މެމްބަރުންނަށް ހިތުގެ ފުނުން ޝުކުރިއްޔާ! އަޅުގަނޑުމެން މިވީހާ ދުވަހު ނަގަހައްޓަމުން މިއައި ހަމަތަކާ އަސާސްތަކުގައި މިޕާޓީއާއެކު ދެގޮތެއްނުވެ، އަބަދުވެސް ދެމިހުންނާނަން. ? pic.twitter.com/XFVuNv0Tgi
އިމްތިޔާޒުގެ ވާހަކަފުޅުތަކަށް ޝުކުރު ދަންނަވަމުން މިނިސްޓަރ ފައްޔާޟް ކުރެއްވި ޓްވީޓެއްގައި ވިދާޅުވީ އެމްޑީޕީގެ ވާދަވެރި ސިޔާސީ ހަރަކާތުން އެނގޭ އެކައްޗަކީ އެމްޑީޕީ ސިޔާސީ ގޮތުން ފައްކާވެފައި އޮތް މިންވަރުކަމަށެވެ. އަދި އިންތިހާބަށް ފަހުގައި ތިބޭނީ އެއްކަށްކަމަށާއި، ޕާޓީ ދާނީ އެކީއެކަށް ކުރިއަށްކަމަށްވެސް ފައްޔާޟް ވިދާޅުވިއެވެ.
ޝުކުރިއްޔާ އިންތި. ވާދަވެރި މި ސިޔާސީ ހަރަކާތުން އެނގޭ އެކައްޗަކީ އެމްޑީޕީ ސިޔާސީ ގޮތުން ފައްކާވެފައި އޮތް މިންވަރު. އަޅުގަނޑުގެ ވާދަވެރި ކެނޑިޑޭޓު ކަމުގައި ވިޔަސް، ކުރިންވެެސް ދެންނެވި ފަދައިން އަޅުގަނޑުމެން އިންތިހާބަށް ފަހުގައި ތިބޭނީ އެއްކޮށް. މިޕާޓީ ދާނީ އެކީ އެކަށް ކުރިއަށް https://t.co/Jkgn6Ll6zx
— Fayyaz Ismail (@faya_i) May 15, 2022
މުޅި ރާއްޖޭގެ ސަމާލުކަމަށް އައި މި އިންތިޚާބަކީ އެމްޑީޕީގެ ކުރިމަގު ކަނޑައެޅުމަށްޓަކައި މުހިންމު އިންތިޚާބެކެވެ. އެމްޑީޕީގެ ޗެއަރޕާސަންގެ މަސްޢޫލިއްޔަތުތަކުގެ ތެރޭގައި ޕާޓީގެ އިންތިޚާބުތައް ރާވާ އިންތިޒާމްކުރުމާއި، އެޕާޓީގެ ދާއިރާތަކުގެ އިންތިޚާބުތަކުގެ އިދާރީ ކަންކަން ހިންގެވުމާއި، އެޕާޓީގެ އުސޫލުތައް ރައްކާތެރިކޮށް ދެމެހެއްޓުން ހިމެނެއެވެ. މީގެ އިތުރުން ޕާޓީއަށް މެންބަރުން އިތުރުކޮށް، ޑިމޮކްރަސީގެ މިންގަނޑުތަކާއި ހަމަހަމަކަންމަތީ ޕާޓީ ކުރިއެރުވުމުގެ މަސައްކަތްކުރުންވެސް ޕާޓީގެ ޗެއަރޕާސަންގެ މަސްއޫލިއްޔަތުގައި ބަޔާންކޮށްފައިވެއެވެ.
ފައްޔާޟް މީގެކުރިންވެސް ވަނީ މި އިންތިޚާބު ކާމިޔާބުކުރެވިއްޖެނަމަ އެންމެ އިސްކަމެއް ދެއްވާނީ ޕާޓީ ހަރުދަނާކޮށް ސަރުކާރާއެކު 2023ގެ ރިޔާސީ އިންތިޚާބު ކާމިޔާބުކުރުމަށްކަމަށް ވިދާޅުވެފައެވެ.