ކޯވިޑް-19އާ ގުޅިގެން ވަޒީފާއަށް އަސަރުކޮށްފައިވާ މީހުންނަށް އަމާޒުކޮށް، ތަމްރީނު ޕްރޮގްރާމްތަކެއް ހިންގުމަށް އިކޮނޮމިކް މިނިސްޓްރީން އިއުލާންކޮށްފިއެވެ. އިކޮނޮމިކް މިނިސްޓްރީން މިހާރު ވަނީ މި ތަމްރީން ޕްރޮގްރާމްތައް ހިންގައިދޭނެ ބަޔަކު ހޯދަންވެސް އިއުލާންކޮށްފައެވެ.
މި ތަންރީން ޕްރޮގްރާމްތައް ހިންގަނީ މައިގަނޑު 2 ދާއިރާއަކުންނެވެ. އެއީ އިންފޮމޭޝަން ކޮމިޔުނިކޭޝަން ޓެކްނޮލޮޖީ (އައި.ސީ.ޓީ) ދާއިރާއާއި ޑައިވިންގ ދާއިރާއެވެ.
މި ތަމްރީން ޕްރޮގްރާމްތަކަކީ ކޯވިޑް-19އާ ގުޅިގެން ވަޒީފާއަށް އަސަރުކޮށްފައިވާ މީހުންނަށް އަމާޒުކޮށް، އިކޮނޮމިކް މިނިސްޓްރީއާއި ވޯލްޑްބޭންކާ ގުޅިގެން ހިންގަމުންދާ "ކޯވިޑް-19 އެމެޖެންސީ އިންކަމް ސަޕޯޓް ޕްރޮޖެކްޓް"ގެ ދަށުން، ހިންގުމަށް ހަމަޖެހިފައިވާ ތަމްރީނު ޕްރޮގްރާމްތަކެކެވެ.
މިދިޔަ އޭޕްރިލް މަހުގެ ތެރޭގައިވެސް އިކޮނޮމިކް މިނިސްޓްރީން ވަނީ މި ތަމްރީން ޕްރޮގްރާމްތައް ހިންގައިދޭނެ ބަޔަކު ހޯދުމަށް އިއުލާންކޮށްފައެވެ. ނަމަވެސް ކޯސްތައް ހިންގުމަށް ކަނޑައެޅިފައިވާ ފީއަށް ބައެއް ބަދަލު ގެނެސް އަލުން މިހާރު ވަނީ ހުޅުވާލާފައެވެ. މި ބުރުގައި އެޕްލިކޭޝަން ހުށަހެޅުމުގެ މުއްދަތު ހަމަވާނީ 30 ސެޕްޓެމްބަރގެ ނިޔަލަށެވެ.
ކޯވިޑް-19އާގުޅިގެން ޢާމްދަނީއަށް އަސަރުކޮށްފައިވާ މީހުންނަށް ސަރުކާރުން ވަނީ އިންކަމް ސަޕޯޓް އެލަވަންސްގެ ނަމުގައި އެލަވަންސެއްވެސް ދޫކޮށްފައެވެ. ފިނޭންސް މިނިސްޓްރީގެ ތަފާސްހިސާބުތައް ދައްކާގޮތުން މުޅި ޖުމްލަ 22،946 މީހަކަށް 421 މިލިއަން ރުފިޔާ ވަނީ ދޫކޮށްފައެވެ.