އަފްޣާނިސްތާނުގައި އަންހެނުން މޫނު ބުރުގާ އަޅަން މަޖުބޫރުކޮށްފިއެވެ.
އަފްޣާނިސްތާނުގައި ވެރިކަންކުރާ ޠާލިބާނު ޖަމާޢަތުން ނެރުނު ޤަރާރެއްގައި ބުނެފައިވަނީ އެ ޤައުމުގެ އަންހެނުން ޢާއްމު ތަންތަނަށް ދާންވާނީ މޫނު ބުރުގާ އަޅައިގެންކަމަށާއި އެންމެ ބޮޑަށް އެދިވެގެންވަނީ އެ ޤައުމުގެ ޘަޤާފީ ނޫކުލައިގެ މޫނު ބުރުގާ އެޅުންކަމަށެވެ. އަދި އެ ގޮތަށް ޢަމަލުނުކުރާ އަންހެނުންގެ އާޢިލާއަށް ނިޞްބަތްވާ ތިމާގެ މީހުން ސަރުކާރުގެ ވަޒީފާތަކުން ވަކިކޮށް ޖޫރިމަނާކޮށް ނުވަތަ ޖަލަށްލެވޭނެކަމަށް ޠާލިބާނުންގެ އެންމެ އިސްވެރިޔާ ހައިބަތުﷲ އަޚޫންޒާދާ ސޮއިކުރައްވައި ނެރުއްވި ޤަރާރުގައި ބުނެފައިވެއެވެ.
އެއީ 2021ވަނަ އަހަރުގެ އޮގަސްޓު މަހުގެ ތެރޭގައި އަފްޣާނިސްތާނުގެ ވެރިކަމަށް ދެވަނަ ފަހަރަށް ޠާލިބާނުން އައުމަށްފަހު އަންހެނުން މޫނު ބުރުގާ އަޅަން މަޖުބޫރުކޮށް ޤަރާރެއް ނެރުނު ފުރަތަމަ ފަހަރެވެ. 1996ން 2001ވަނަ އަހަރަށް ޠާލިބާނުން އަފްޣާނިސްތާނުގައި ވެރިކަންކުރި ދުވަސްވަރުވެސް އެފަދަ ނިންމުމެއް ތަންފީޒުކޮށްފައިވެއެވެ. ދީނީ ސަބަބުތަކަށްޓަކައި އަފްޣާނިސްތާނުގެ އަންހެނުން ހިޖާބު ނުވަތަ ބުރުގާއަޅައެވެ. ނަމަވެސް ވެރިރަށް ކާބުލްފަދަ ސަރަޙައްދުތަކުގައި މޫނު ބުރުގާ އެޅުން މަދެވެ.
މީގެ ކުރިން އަންހެންކުދިން މަދަރުސާއަށް ދިޔުމަށް ދިން ޙުއްދަވެސް ޠާލިބާނުންވަނީ ބާޠިލުކޮށްފައެވެ.