އުރީދޫ ދިވެހި ޕްރިމިއާ ލީގުގައި ދަ ގްރާންޑޭ ސްޕޯޓްސް ކުލަބު ބަލިކޮށް ތާވަލުގެ ހަތަރުވަނައަށް ޓީސީ ސްޕޯޓްސް ކުލަބު ޖެހިލައިފިއެވެ.
ގައުމީ ފުޓްބޯޅަ ދަނޑުގައި ހުކުރު ދުވަހުގެރޭ ކުޅުނު މެޗު ޓީސީން ކާމިޔާބުކުރީ 3-0 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 12 ވަނަ މިނެޓުގައި ދަ ގްރާންޑޭގެ ސްރީ ލަންކާގެ ފޯވާޑް މުޙައްމަދު އާކިބް ފޮނުވާލި ހަމަލާއެއް ޓީސީގެ ލަންކާގެ ގޯލްކީޕަރު ސުޖަން ޕެރޭރާ ވަނީ މަތަކޮށްފައެވެ.
މި މެޗުގައި ޓީސީން ލީޑު ނަގާފައިވަނީ މެޗުގެ 27 ވަނަ މިނެޓުގައެވެ. އަރިމަތިން ލިބުނު ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ހައިޝަމް ރަޝީދެވެ. އޭގެ ފަހުން ފުރަތަމަ ހާފުގައި އޭރިއާ ބޭރުން ޓީސީގެ ހުސެއިން އަހުސަމް މޫސާ ފޮނުވާލި ހަމަލާ ދަ ގްރާންޑޭގެ ގޯލްކީޕަރު ހަސަން މުއާޒް ވަނީ މަތަކޮށްފައެވެ.
މި މެޗުގެ ދެވަނަ ހާފު ފަށައިގެން ދަ ގްރާންޑޭއިން ރަނގަޅު ކުޅުމެއް ދެއްކިއިރު، މި ހާފުގެ ކުރީކޮޅު އެ ޓީމުގެ އާކިބް އޭރިއާތެރެއަށް ވަދެ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. އޭގެ ފަހުން މެޗުގެ 60 ވަނަ މިނެޓުގައި ހިލޭ ޖެހުމަކުން ޓީސީގެ ހައިޝަމް ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ. އަދި އޭގެ ހަ މިނެޓު ފަހުން ދަ ގްރާންޑޭގެ އާކިބަށް ހުސް ފުރުސަތެއް ލިބުނު ނަމަވެސް، އޭރިއާތެރެއަށް ވަދެ އޭނާ ފޮނުވާލި ހަމަލާ ދިޔައީ އަރިމަތިން ބޭރުންނެވެ.
މި މެޗުގެ 70 ވަނަ މިނެޓުގައި ޓީސީގެ މިސްރުގެ ފޯވާޑް އޮމަރު ސަލާހަށްވެސް ވަނީ މުޅިން ހުސް ފުރުސަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން އޭނާ ފޮނުވާލި ހަމަލާ ކީޕަރު މުއާޒް ވަނީ ހުއްޓުވާފައެވެ.
މި މެޗުގައި ދަ ގްރާންޑޭއަށް އިތުރު މައްސަލަތަކެއް ކުރިމަތިވީ މެޗުގެ 76 ވަނަ މިނެޓުގައި އެ ޓީމުގެ ޑިފެންޑަރު އިބްރާހީމް އުސާމާ ހަސަން މަޖީދަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އެއާއެކު ދަ ގްރާންޑޭގެ ކުޅުންތެރިއަކު މަދުވުމުގެ ފައިދާނަގައި، މެޗުގެ 80 ވަނަ މިނެޓުގައި ޓީސީން ވަނީ ލީޑު ފުޅާކޮށްފައެވެ. އޮމަރު ސަލާހު ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މުޙައްމަދު މުސްލިހު (މުއްޓި) އެވެ. އަދި ޓީސީގެ ތިންވަނަ ލަނޑު މެޗުގެ 86 ވަނަ މިނެޓުގައި މުސްލިހު ދިން ބޯޅައަކުން ކާމިޔާބުކޮށްދިނީ ބަދަލު ކުޅުންތެރިޔާ ނިޝާމް މުހައްމަދު ރަޝީދު (ޕޮގްބާ) އެވެ.
މި މޮޅާއެކު ތާވަލުގެ ހަތަރުވަނައަށް ޓީސީ ޖެހިލީ ތިންވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އާއި ފަސްވަނައިގައި އޮތް ޔުނައިޓެޑް ވިކްޓަރީ (ޔޫވީ) އާ އެއްވަރަށް ޕޮއިންޓް ހޯދައިގެންނެވެ. އެގޮތުން އެ ތިން ޓީމަށްވެސް ވަނީ ކުޅުނު 11 މެޗުން 14 ޕޮއިންޓް ލިބިފައެވެ. އަދި ފުލުގައި ދަ ގްރާންޑޭ އޮތީ ކުޅުނު 11 މެޗުން ލިބުނު އެންމެ ޕޮއިންޓަކާއެކުއެވެ.