ފުވައްމުލަކު ނެރާދިމާއިން ބޭރަށް ޑައިވިންއަށް ގޮސް އުޅެނިކޮށް ގެއްލުނު މުހައްމަދު ސައީދު ހޯދުމަށް އެމްއެންޑީއެފް ކޯސްޓްގާޑުން ކުރިއަށްގެންދާ އޮޕަރޭޝަންގައި ކަނޑު އަޑިން ޑައިވް ބެލްޓެއް ފެނިފައިވާ ކަމަށް އެމްއެންޑީއެފުން ވިދާޅުވެއްޖެއެވެ.
މިބެލްޓް ފެނިފައިވަނީ އޭނާ ޑައިވަށް ދިޔަ ސަރަހައްދުގެ 68 މީޓަރު އަޑިން ކަމަށް އެމްއެންޑީއެފުން ވިދާޅުވެއެވެ.
މިމަހުގެ 2ވަނަ ދުވަހު ޏ.ފުވައްމުލަކު ނެރުކައިރިއަށް ޑައިވް އަށް ދިޔަ ފަހުން ވީނުވީއެއް ނޭނގި ގެއްލިފައިވާ މުހައްމަދު ސައީދު ހޯދުމަށް ކުރަމުންދާ މަސައްކަތުގައި އެމްއެންޑީއެފް ކޯސްޓްގާޑުގެ ޑައިވަރުން މިއަދުވަނީ 4 ޑައިވް ކޮށްފައެވެ. މިހާތަނަށް ކުރެވުނު މަސައްކަތުން އޭނާ އަދިވެސް ފެނިފައިނުވާކަމަށް އެމްއެންޑީއެފުން ހާމަކުރައްވައެވެ.
ގެއްލިގެން ހޯދަމުންދާ މީހާއާއި ބެހޭ އެއްވެސް ޚަބަރެއް ލިބިއްޖެނަމަ ލަސްނުކޮށް އެންގުމަށާއި އެ ސަރަހައްދުން ދަތުރުކުރާ އުޅަނދުފަހަރުތަކުންވެސް ބަލައިދިނުމަށް އެމްއެންޑީއެފްއިންވަނީ އެދިވަޑައިގެންފައެވެ.
ފުއައްމުލަކު ނެރުމައްޗަކީ ޑައިވްކުރަން ވަރަށް މަޤްބޫލް ސަރަހައްދެކެވެ. ޑައިވް ސްޕޮޓެއްގެ ގޮތުގައި އެތަން މަޝްހޫރު ވަނީ ގިނަ އަދަދަކަށް ޓައިގަރ ޝާކް ނުވަތަ ފެމުނު މިއަރު ފެންނަ ސަރަހައްދަކަށް އެތަން ވާތީއެވެ. ޓައިގަރ ޝާކް ބެލުމަށް އެތަނަށް މީހުން ޑައިވިންއަށް ބާލަނީ މިޔަރުތަކަށް ރަނގަޅަށް ކާންދިނުމަށްފަހުއެވެ. ބޮޑެތި މިޔަރުތަކާއެކު ފޮޓޯނަގާ ގިނަބަޔަކު އަންނަނީ ސޯޝަލް މީޑިއާގައި ފޮޓޯތައްވެސް ޙިއްސާކުރަމުންނެވެ.
މިދުވަސްވަރަކީ ކަނޑު ގަދަ ދުވަސްވަރަކަށްވުމާއެކު ކަނޑު ދަތުރު ފަތުރުކުރާ ފަރާތްތަކުން މޫސުމަށް ސަމާލުވުމަށާއި، ޗުއްޓީގައި ރަށްރަށަށް ގޮސް މޫދަށް އެރިއުޅޭއިރު ސަމާލުވުމަށް އެމްއެންޑީއެފްއިން ވަނީ އިލްތިމާސްކޮށްފައެވެ.