މި މަހު ރާއްޖޭގައި ބާއްވާ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕުގައި ވާދަކުރާ ޖޫނިއާ ޓޭބަލް ޓެނިސް ޓީމު ބީހައިވް ހޮޓެލުގައި ކޭމްޕުކޮށްފިއެވެ.
މިއީ އަމިއްލަ ގައުމުގައި ބާއްވާ މުބާރާތެއްގައި ރާއްޖޭގެ ޖޫނިއާ ޓީމަކުން ކޭމްޕުކުރި ފުރަތަމަ ފަހަރެވެ.
ރާއްޖޭގެ ޖޫނިއާ ފިރިހެން ޓީމުގައި ހިމެނޭ ކުޅުންތެރިންނަކީ މުޙައްމަދު ތާބިން ސުޖާއު، އިބްރާހީމް އައުޒަމް އަޒީމް، ޒީކް ހުސައިން ލަތީން އަދި އުމީރް މުހައްމަދު މުއިއްޒުއެވެ. ޖޫނިއާ އަންހެން ޓީމުގެ ކުޅުންތެރިންނަކީ ރާއްޖޭގެ އެއް ނަމްބަރު ޓީޓީ ކުޅުންތެރިޔާ ފާތިމަތު ދީމާ އަލީ، އާއިޝަތު ރަފާ ނާޒިމް، މިޝްކާ މުޙައްމަދު އިބްރާހީމް އަދި މަލާކް ބިންތި މުއިއްޒުއެވެ.
ކެޑޭޓް ފިރިހެން ޓީމުގައި ހިމެނެނީ ޒީކް ހަސަން ލަތީފް، އުމީރް މުޙައްމަދު މުއިއްޒު އަދި އަޙްމަދު ރައްޔާން މުޙައްމަދު އަނީސްއެވެ. ކެޑޭޓް އަންހެން ޓީމުގައި ހިމެނޭ ކުޅުންތެރިންނަކީ ފާތިމަތު ދީމާ އަލީ، މިޝްކާ މުޙައްމަދު އިބްރާހީމް އަދި މަލާކް ބިންތި މުއިއްޒުއެވެ.
ރާއްޖޭގެ ޓީޓީ ޓީމުގެ ކޯޗަކީ ގްރީސްގެ ކޮންސްޓަންޓީނޯސް ކޮސްޓޮޕޮލޮސް (ކޮސްޓޯ)އެވެ. ކޮސްޓޯ އާއިއެކު ހަރަކާތްތެރިވާނެ ކޯޗިންގ ޓީމަކީ، މުޙައްމަދު މުންތިފް އަޙްމަދު، މޫސާ މުންސިފް އަޙްމަދު އަދި ފާތިމަތު ޖުމާނާ ނިމާލްއެވެ. އަދި ޓީމުގެ މެނޭޖަރަކީ އާއިޝަތު ފަދުވާ ރަޝީދެވެ.
މި މުބާރާތައް ތައްޔާރުވުމުގެ ގޮތުން ރާއްޖޭގެ ޓީމުގެ ފަރިތަކުރުންތަކުގައި ކްރޮއޭޝިއާގެ ދެ ކުޅުންތެރިންނާ ކޯޗަކުވެސް ވަނީ ބައިވެރިވެފައެވެ.
މި މުބާރާތުގައި އެތުލީޓުން ބައިވެރިވާ ޤައުމުތަކުގެ ތެރޭގައި ރާއްޖޭގެ އިތުރުން ސްރީލަންކާ، ބޫޓާން،ނޭޕާލް، ބަންގްލަދޭޝް، އިންޑިޔާ އަދި ޕާކިސްތާން ހިމެނެއެވެ.
މީގެ ކުރިން 2019 ވަނަ އަހަރު ބޭއްވި މި މުބާރާތުގެ ކެޑޭޓް ބައިގެ ފައިނަލުގައި ރާއްޖޭގެ އެއް ނަމްބަރު ޓީޓީ ކުޅުންތެރިޔާ ދީމާ ވަނީ ކުޅެފައެވެ.