އުތުރުގެ ރަށެއްގައި ކުޑައަންހެން ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި މީހަކު ހައްޔަރުކޮށް، ޝަރީއަތް ނިމެންދެން ބަންދުކޮށްފިއެވެ.
ފުލުހުން ވިދާޅުވީ ނ. ރ. ބ. އަދި ޅ. އަތޮޅު ހިމެނޭ ނޯތު ޕޮލިސް ރީޖަންގެ ރަށެއްގައި، އުމުރުން 18 އަހަރުން ދަށުގެ ކުޑަކުއްޖަކަށް އިތުބާރުކުރެވޭ މަގާމެއްގައި ހުރި މީހަކު ޖިންސީ ގޯނާކުރި ކަމަށް ބުނާ މައްސަލައެއް މިދިޔަ ހޮނިހިރު ދުވަހު ފުލުހުންނަށް ހުށަހަޅާފައިވާ ކަމަށެވެ.
އެމައްސަލައިގެ ތުހުމަތު ކުރެވޭ މީހާ އިއްޔެ ހައްޔަރުކޮށް އޭނާގެ ބަންދުގެ މުއްދަތު އިތުރު ކުރަން ކޯޓަށް ގެންދިއުމުން ޝާރީޢަތް ނިމެންދެން އޭނާ ބަންދު ކުރަން ކޯޓުން އަމުރު ކޮށްފައިވާކަމަށް ފުލުހުން ވިދާޅުވިއެވެ.
މިމައްސަލައިގައި ހައްޔަރު ކޮށްފައި ވަނީ ޢުމުރުން 40 އަހަރުގެ ފިރިހެނެކެވެ.
މިއީ ކުޑަކުއްޖަކު ހިމެނޭ މައްސަލައެއް ކަމަށް ވާތީ މިމައްސަލައިގެ އިތުރު ތަފްސީލެއް ފުލުހުން ހާމައެއް ނުކުރެއެވެ. ފުލުހުން ވިދާޅުވީ މިމައްސަލަ ޖެންޑަރ މިނިސްޓްރީ އާއި ގުޅިގެން މިހާރު ތަހްގީގު ކުރަމުން ގެންދާ ކަމަށެވެ.