ގިނަ ދުވަސްތަކެއްގެ މެދުކެނޑުމަކަށްފަހު މަޝްހޫރު ޓީވީ ޕްރެޒެންޓަރ އަޙްމަދު ޝަކީބް (ޝަކީބްބެ) ޕްރެޒެންޓަރެއްގެ ގޮތުގައި އަނެއްކާވެސް ޓީވީ މޯލްޑިވްސްގެ ސްކީރުން މިރޭ ފެންނާނެއެވެ.
މިރޭ ޝަކީބްބެ ފެންނާނީ ޓީވީއެމްގެ "960" ޕްރޮގްރާމް ޕްރެޒެންޓްކުރުގެ ގޮތުގައެވެ. މިއީ މިޕްރޮގްރާމްގެ 2ވަނަ ސީޒަންގެ ފުރަތަމަ ބުރުގެ 6ވަނަ ޝޯއެވެ. މިހާތަނަށް 960 ޕްރޮގްރާމްގެ ޝޯތައް ޕްރެޒެންޓް ކޮށްފައިވަނީ ޕްރެޒެންޓަރ އަހްމަދު އިޝާން (އަންސި)އެވެ. އެހެންނަމަވެސް މިރޭގެ ޝޯއިން ފެށިގެން ޕްރޮގްރާމް ހުށަހަޅައިދިނުމަށް މިހާރު ހަމަޖެހިފައިވަނީ، މަޝްހޫރު ޕްރެޒެންޓަރ އަހްމަދު ޝަކީބެވެ.
ޝަކީބްބެ އެންމެ ފަހުން ޕްރެޒެންޓްކޮށްފައިވަނީ 2016ވަނަ އަހަރުއެވެ. އޭއަށްފަހު ޓީވީއެމްގެ ޝޯއަކުން ޝަކީބްބެ ފެނިގެންމިދަނީ މިރޭ އަލަށެވެ.
ޝަކީބްބެއަކީ ޓީވީ ޕްރޮގްރާމްތައް ޕްރެޒެންޓްކުރުމުގައި ޒަމާންވީ މަޝްހޫރު އެހާމެ ކުޅަދާނަ ބޭފުޅެކެވެ. އޭނާއަކީ ތިޔަބޭފުޅުންގެ ފުރުސަތު، އެހާރާއި މިހާރު، އެހަނދާނުގައި، ހެއްޔަންބޯގެ އިތުރުން ދިވެހި ރާއްޖޭގެ އެންމެ އަލިގަދަ ތަރި ފަދަ ބޮޑެތި ޓީވީ ޝޯތައް ހުށަހަޅައިދީފައިވާ މީހުންގެ މެދުގައި މަޤްބޫލު ބޭފުޅެކެވެ. އަދި ޕްރެޒެންޓްކުރުމުގެ ދާއިރާގައި ގިނަ ދުވަސްތަކެއް ހޭދަކުރެއްވި މީހުންގެ އިހްތިރާމް ލިބިފައިވާ ބޭފުޅެއްވެސްމެއެވެ.
960 ޕްރޮގްރާމަކީ ދިވެހިންގެ ޤައުމިއްޔަތު ދިރުވައި އާލާކުރުމުގެ މަގްސަދުގައި ކުރިއަށްގެންދާ ޕްރޮގްރާމެކެވެ. މިޕްރޮގްރާމްގައި 4 ދާއިރާއަކަށް ބަހާލައިގެން ސުވާލުކުރުން ކުރިއަށްގެންދެއެވެ. މިގޮތުން އެދާއިރާތަކަކީ ތިމާވެއްޓާއި، ދިވެހި ބަހާއި، ތާރީޚާއި ޖޯގްރަފީއެވެ.
މިޕްރޮގްރާމްގައި މިރޭ ކުރިއަށްދާ 2ވަނަ ސީޒަންގެ ފުރަތަމަ ބުރުގެ 6ވަނަ ޝޯގައި 6 ބައިވެރިން ވާދަކުރާނެއެވެ. އަދި މިރޭގެ އެޕިސޯޑް ނިމިގެންދާއިރު ކުރިއަށް އޮތް ސެމީ ފައިނަލް ބުރުގައި ވާދަކުރާ ބައިވެރިން ކަށަވަރު ވެގެން ދާނެއެވެ. އަދި ސެމީފައިނަލްގެ 3 ޝޯގައި ވާދަކުރާ ފަރާތްތަކުގެ ތެރެއިން އެންމެ މަތިން މާކްސް ލިބޭ 2 ބައިވެރިން ފައިނަލަށް ދަތުރުކުރާނެއެވެ.
މިޕްރޮގްރާމްގެ ކޮންމެ ޝޯއެއް ކުރިއަށްގެންގޮސްފައިވަނީ 5 ބުރަކަށް ބަހާލައިގެންނެވެ. ފުރަތަމަ ބުރުގައި ކޮންމެ ބައިވެރިއަކަށް ހަތަރު ސުވާލު ކުރާނެއެވެ. ދެވަނަ ބުރުގައި ކޮންމެ ބައިވެރިއަކަށްވެސް ކުރާނީ އެންމެ ސުވާލެކެވެ. ތިންވަނަ ބުރަކީ "ބަޒަރ ރައުންޑް"ގެ ގޮތުގައި ކުރިއަށްގެންދާ ބުރެކެވެ. މިބުރުގައި އެންމެ ފުރަތަމަ ބަޒަރއަށް ފިއްތާ ބައިވެރިއަކަށް ސުވާލުގެ ޖަވާބު ދިމާކުރުމުގެ ފުރުސަތު ލިބިގެންދާނެއެވެ. ހަތަރުވަނަ ބުރުގައި ކޮންމެ ބައިވެރިއަކަށްވެސް 10 ސުވާލު ކުރާނެއެވެ. އެންމެ ފަހު ބުރެއްގެ ގޮތުގައި ކޮންމެ ބައިވެރިއަކާވެސް އެއް ސުވާލު ކުރާނެއެވެ. ނަމަވެސް މިބުރުގައި އެބޭފުޅަކު ޚިޔާރުކުރާ ފަރާތަކުން އެހީތެރިކަން ހޯދޭނެއެވެ.
އޯޑިއެންސާވެސް އެކު ކުރިއަށްގެންދާ މި ޕްރޮގްރާމްގައި ވާދަކުރާ މީހުންގެތެރެއިން 1ވަނަ އަށް އަންނަ މީހަކަށް 50،000ރ ގެ ފައިސާގެ އިނާމެއް، 2ވަނަ އަށް އަންނަ މީހަކަށް 25،000ރ ގެ ފައިސާގެ އިނާމެއް ލިބޭނެއެވެ.