ކ.މާފުށީގައި މިއަހަރުގެ ފިޠުރު ޢީދު ކުލަގަދަކޮށް ފާހާގަކުރުމަށް އެރަށުގައި ހަވާއެރުވުމަށް ނިންމައިފިއެވެ.
މިއަަހަރުގެ ފިތުރު އީދު މާފުށީގައި ކުލަގަދަކޮށް ފާހަގަކުރުމަށް ދަނީ ތައްޔާރުވަމުންނެވެ.
މާފުށީ ކައުންސިލުން ވިދާޅުވީ ހަވާއެރުވުމަށް ހަމަޖެހިފައިވަނީ ފިޠުރު ޢީދު ދުވަހުގެ ރޭ ބާއްވާ މިއުޒިކް ޝޯވްގެ ތެރެއިން ކަމަށެވެ. އަދި ހަވާއެރުވުން ކުރިއަށް ގެންދިޔުމަށް ހަމަޖެހިފައިވަނީ އެރަށުގައި އެންމެ ފުޅާ ދާއިރާއެއްގައި ގެސްޓްހައުސް ހިންގާ ކާނި ހޮޓެލްސްއާއި އެރީނާ ހޮޓެލްސްގެ އެހީތެރިކަމާއެކުކަމަށް ކައުންސިލުން މައުލޫމާތުދެއެވެ.
މާފުށީގައި ބޭއްވުމަށް ހަމަޖެހިފައިވާ ޢީދުގެ ހަރަކާތްތަކުގެ ތެރޭގައި އެދުވަހު ހެންދުނު ބިރާގަން ސްޕޯޓްސް ކްލަބްގެ ފަރާތުން އާއްމުންނަށް ހުޅުވާލައިގެން ކުޅިވަރުގެ ހަރަކާތްތައް ބޭއްވުމަށް ވަނީ ހަމަޖެހިފައެވެ. މީގެ އިތުރުން އެދުވަހުގެ ހަވީރު ކުޑަކުދިންނަށް ޚާއްސަކޮށްގެން ކުޑަކުދިންގެ ހަވީރެއް ބޭއްވުމަށްވެސް ވަނީ ހަމަޖެހިފައެވެ.
މާފުށި ކައުންސިލުން ވިދާޅުވީ އީދު ދުވަހުގެރޭ ހުރިހާ އުމުރުފުރާތަކަށް ޚާއްސަކޮށްގެން މިއުޒިކް ޝޯވއެއް ބޭއްވުމަށްވެސް ހަމަޖެހިފައިވާކަމަށެވެ. މި ޝޯވްގައި "ޔާރާ" ޓީމާއި "ހަބޭސް" ބޮޑުބެރު ގުރޫޕާއި ޞަފޫރާ އެންޑް ފްރެންޑްސްގެ ލައިވް މިއުޒިކްގެ އިތުރުން ޑީޖޭ ބައި އިންމަގެ ފޯރިގަދަ ހުށައެޅުންތަކެއްވެސް ފެންނާނެކަމަށް ކައުންސިލުން ވިދާޅުވެއެވެ.
އީދު ޝޯ ބޭއްވުމަށްޓަކައި އެމްޓީސީސީގެ ސީއެސްއާރްގެ ދަށުން މާފުށީގައި ކުރިން އިސްލާހިއްޔާ ހިންގި ބިމުގައި ހުރި އިމާރާތްތައް ތަޅާ އެތަން ވަނީ ސާފުކޮށްފައެވެ.
ފިތުރު އީދު ބަންދާއި ދިމާކޮށް މާފުއްޓަށް ގާތްގަނޑަކަށް 6 ހާހެއްހާ މީހުން ޒިޔާރަތްކުރާނޭކަމަށް ލަފާކުރެވޭކަމަށް އެ ރަށު ކައުންސިލުން ވިދާޅުވެއެވެ. އެހެންކަމުން އީދުގެ އުފަލުގައި ބައިވެރިވާން މާފުއްޓަށް ޒިޔާރަތްކުރާ ފަރާތްތަކަށް އެކަމަޑޭޝަނާއި ދަތުރުފަތުރުގެ އިންތިޒާމް ފަސޭހައިން ހަމަޖައްސައިދިނުމުގެ މަސައްކަތް ކަމާބެހޭ ފަރާތްތަކުގެ އެހީގައި ކުރިއަށްގެންދާނޭކަމަށް މާފުށީ ކައުންސިލުން ވަނީ ވިދާޅުވެފައެވެ.
އެގޮތުން ޢީދު ދުވަހު މާލެއިން މާފުއްޓަށް ދަތުރުކުރާ ފަރާތްތަކަށް އެރޭ ޝޯވ ނިންމާލާފައި އެނބުރި މާލެ އާދެވޭނެ އިންތިޒާމް ހަމަޖައްސަމުންދާކަމަށް ކައުންސިލުން ވަނީ ވިދާޅުވެއެވެ.