އީރާނުގެ ރައީސް ޙަސަން ރޫޙާނީ އަންނަ ހަފްތާގައި ވިލާތުގެ ދެޤައުމަކަށް ރަސްމީ ދަތުރުފުޅެއް ކުރައްވާނެކަމަށް ޚަބަރު ލިބިއްޖެއެވެ.ވިލާތުގެ ޑިޕްލޮމެޓިކް ދާއިރާތަކާއި ޙަވާލާދީ ރޮއިޓާސް ނިއުސް އޭޖެންސީއިން ޚަބަރުދޭގޮތުގައި އީރާނުގެ ރައީސް ޙަސަން ރޫޙާނީ ޒިޔާރަތް ކުރެއްވުމަށް ހަމަޖެހިފައިވަނީ އިޓަލީވިލާތަށާއި ފަރަންސޭސިވިލާތަށެވެ. ރައީސް ރޫޙާނީ އިޓަލީއަށް ވަޑައިގަންނަވާނީ މިމަހުގެ 25 ވާ ހޯމަދުވަހުއެވެ. އަދި ފަރަންސޭސިވިލާތަށް ވަޑައިގަންނަވާނީ 26 ވާ އަންގާރަ ދުވަހުއެވެ.ރޫހާނީގެ މިދަތުރުފުޅުގައި މިދެޤައުމުގެ އިސް މަސްއޫލުވެރިންނާއި، ބޮޑެތި ކުންފުނިތަކުގެ އިސްވެރިންގެ އިތުރުން ގިނަ އަދަދެއްގެ ވިޔަފާރިވެރިންނާވެސް ބައްދަލުކުރެއްވުމަށް ހަމަޖެހިފައިވެއެވެ. މިއީ އީރާނާއި ދެކޮޅަށް އެމެރިކާއާއި ވިލާތުގެ ޤައުމުތަކުން އަޅާފައިވާ ދަތިކުރުމުގެ ފިޔަވަޅުތައް އުވާލި ފަހުން އީރާނުގެ ރައީސް ޤައުމުން ބޭރަށް ކުރައްވާ ފުރަތަމަ ދަތުރުފުޅެވެ.