ރަމަޟާންމަހަކީ އަޅުކަމުގެ މައްސަރެވެ. އެހެން މަސްމަހާ ޚިލާފަށް ކުދިބޮޑު އެންމެން އަޅުކަމުގައި ހޭދަކުރާ ވަގުތު އިތުރުވެއެވެ. ރަމަޟާން މަހުގައި ފަހަކަށް އައިސް ކުޑަކުދިން އިމާމުވެ ނަމާދުކުރާ މަންޒަރަކީ ރާއްޖޭގެ ބައެއް މިސްކިތްތަކުން ފެންނަ ހިތްގައިމު މަންޒަރެކެވެ. މިފަހަރު މިމަންޒަރު ފެނިގެންދަނީ ޅ.ނައިފަރުގެ މިސްކިތްތަކުންނެވެ.
ކީރިތި ޤުރުއާން ހިތުދަސްކުރުމުގެ ޝައުގު ކުދިންގެ ހިތްތަކުގައި އާލާކޮށް އެމަސައްކަތް ރާއްޖޭގެ އެކި ސަރަޙައްދުތަކުގައި އަންނަނީ ކުރަމުންނެވެ. ސަރުކާރާއި އަމިއްލަ ފަރާތްތައް ގުޅިގެންނެވެ. އެގޮތުން ޅ.ނައިފަރުގައިވެސް އަންނަނީ މިފަދަ ހިފްޒު ކުލާހެއް ހިންގަމުންނެވެ. ކުލާހުގައި ކިޔަވަމުންދާ ކުދިންގެ ތެރެއިން 5 ކުއްޖަކު މިހާރުވަނީ 12 ފޮތް ދަސްކޮށްފައެވެ. މިއާއެކު މިކުދިންގެ ހިތުގައި ޤުރުއާނަށް އޮތް ލޯތްބާއި ޝައުގު އިތުރުކުރުމަށް ހިފްޒު ކުލާހާއި ކައުންސިލުން ގުޅިގެން މިއަހަރުވަނީ މިކުދިންނަށް ދަމު ނަމާދު އިމާމުވެ ކުރުމުގެ ފުރުސަތު ދީފައެވެ.
ނައިފަރުގެ 3 މިސްކިތެއްގައި ރަމަޟާން މަހު ދަމުނަމާދު ކުރާ ކުދިންނާއި ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން ނައިފަރު ކައުންސިލްގެ ރައީސް މުޙައްމަދު ރަޝީދު ވިދާޅުވީ މިއީ ހިފްޒު ކުލާހުގެ ފަރާތުން އެދުނު އެދުމެއްކަމަށެވެ. ދަމު ނަމާދުގެ އިތުރުން ތަރާވީސް ނަމާދުކުރުމުގެ ފުރުސަތު ދިނުމަށްވެސް ހިފްޒް ކުލާހުގެ ފަރާތުން އެދިފައިވާ ކަމަށް ކައުންސިލް ރައީސް ވިދާޅުވިއެވެ. އެހެންނަމަވެސް އޭރު ރާއްޖެއިން ބޭރުން ތަރާސްވީކުރުމަށް އިމާމުން ގެނައުމުގެ މަސައްކަތް ފަށާފައިވާތީ އެފުރުސަތު މިއަހަރު ނުދެވުނުކަމަށް ކައުންސިލުން ވިދާޅުވިއެވެ.
ގުރޭޑު 7 ގައި ތަޢުލީމު ޙާސިލުކުރަމުން އަންނަ އުމުރުން 12 އަދި 13 އަހަރުގެ މި ފަސްކުދިންގެ ތެރޭގައި ހިމެނެނީ ޢަބްދުﷲ ޙަޔާން ޙަމީޒާއި އާސިރު ޢާރިފް ޔޫސުފާއި އިސްމާޢީލް އަޝްހަމް އަޙްމަދާއި ޢާރިޝް ޢަބްދުﷲ އިބްރާހިމާއި މިރުޢާޝް ޙުސެއިން މިރުޒާއެވެ. މިކުދިންވަނީ ކީރިތި ޤުރުއާނުން 12 ފޮތް ހިތު ދަސްކޮށްފައެވެ. މީގެތެރެއިން މަސްޖިދުއް ތަޤުވާގައި ދަމުނަމާދުކުރާ ކުއްޖާއާއެކު ނަމާދުކުރުމަށް ހަމަޖެހިފައިވަނީ އައްޝައިޚް އަޙްމަދު ނާޒިލް މުޙައްމަދެވެ.
ކައުންސިލްގެ ރައީސް މުޙައްމަދު ރަޝީދު ވިދާޅުވީ ކުދިންނަށް މިފުރުސަތު ދިނުމުގެ ކުރިން ރަށުގައި ތިބި ޝައިޚުންނާ މަޝްވަރާކުރައްވާފައިވާކަމަށެވެ. އަދި މިކުދިންގެ ކިބައިގައި އިމާމުވެ ފަރުޟު ނަމާދުކުރުމުގެ ޤާބިލުކަން ހުރިތޯ ބަލާފައިވާކަމަށްވެސް ކައުންސިލުން ވިދާޅުވެއެވެ.
ރަމަޟާން މަހުގެ ފަހު 10 ގެ ދަމު ނަމާދުކުރުމަށް ނައިފަރުގެ މަސްޖިދުއް ތަޤުވާއާއި މަސްޖިދުއް ޣުފްރާންއާއި މަސްޖިދުއް ހާދީގައި ކޮންމެ ރެއަކު ބަހާލައިގެން ދެކުދިން އިމާމުވެ ނަމާދުކުރާނެއެވެ. މިގޮތުން ކޮންމެ ކުއްޖަކަށް ކުރުމަށް ހަމަޖެހިފައިވަނީ 4 ރަކުޢަތްކަމަށް ކައުންސިލުން ވިދާޅުވެއެވެ. ކޮންމެ މިސްކިތެއްގައިވެސް ދަމުނަމާދުގެ 8 ރަކުޢަތާއި ވިތުރި ކުރުމަށްވަނީ ހަމަޖެހިފައެވެ. ވިތުރި ކުރާނީ ހިފްޒު ކުލާހުން ކަނޑައަޅާފައިވާ މީހެއްކަމަށް ކައުންސިލުން ވިދާޅުވެއެވެ. ކައުންސިލުން ވިދާޅުވީ މިކަމުގައި މިސްކިތްތަކުގެ އިމާމުންގެ އެހީތެރިކަމާއި އެއްބާރުލުން ލިބޭކަމަށެވެ. އެގޮތުން މިދަރިވަރުން ކިޔަވަމުންދާއިރު އިމާމުން އަޑުއަހަމުންދާނެކަމަށް ކައުންސިލުން ވިދާޅުވެއެވެ.
ކީރިތި ޤުރުއާނަށް ލޯބި ޖައްސާ މިރޮނގުން ކުރިއަށްދާން ޝައުގުވެރިވާ ކުދިންނަށް ފުރުސަތު ފަހިކޮށްދިނުމަށް ކުރިއޮތްތަނުގައިވެސް ބާރުއަޅުއްވާނެކަމަށް ކައުންސިލުން ވިދާޅުވެއެވެ. މިދިޔަ އަހަރުވެސް ނައިފަރުގެ މިސްކިތެއްގައި ކުއްޖަކުވަނީ އިމާމުވެ ދަމު ނަމާދުގެ 4 ރަކުޢަތްކޮށްފައެވެ.