ސުރީ ލަންކާގެ ވަޒީރުންގެ މަޖިލީހަށް އައު މެންބަރުން ޢައްޔަންކޮށްފިއެވެ.
ސުރީ ލަންކާއަށް ކުރިމަތިވެފައިވާ ނާޒުކު އިޤްތިޞާދީ ޙާލަތުގެ ސަބަބުން ރުޅިގަދަވެފައިވާ ޢާއްމުން އެ ޤައުމުގެ އެކި ސަރަޙައްދުތަކުގައި މުޒާހަރާކުރަން ފެށުމުން އެ ޤައުމުގެ ވަޒީރުންގެ މަޖިލީހުގައި ހިމެނޭ 26 ވަޒީރުންވަނީ އެއްފަހަރާ އިސްތިޢުފާދީފައެވެ. އޭގެ ތެރޭގައި ސުރީ ލަންކާގައި ވެރިކަންކުރާ ރާޖަޕަކްސަ ޢާއިލާއަށް ނިޞްބަތްވާ ވަޒީރުންވެސް ހިމެނިވަޑައިގަންނަވައެވެ. ނަމަވެސް ސަރުކާރު ހުއްޓުމަކަށް އަޔަނުދިނުމަށް އެ ޤައުމުގެ ވަޒިރުންގެ މަޖިލީހަށް އޭޕުރިލް މަހުގެ 5ވަނަ ދުވަހުވަނީ ހަތަރު މެންބަރުން ޢައްޔަންކޮށްފައެވެ. އެ ގޮތުން އެ ޤައުމުގެ މާލީ ވަޒީރުގެ މަޤާމަށް ޢައްޔަންކޮށްފައިވަނީ ކުރިން ޢަދުލުއިންޞާފާބެހޭ ވަޒީރުކަންކުރެއްވި ޢަލީ ޞަބްރީއެވެ.
ދެ ހަފުތާއަށްފަހު ސުރީ ލަންކާގެ ރައީސް ގޮތަބަޔާ ރާޖަޕަކްސަ އަލުން އެކުލަވާލެއްވި ވަޒީރުންގެ މަޖިލީހަށްވަނީ 17 މެންބަރުން ޢައްޔަންކުރައްވައިފައެވެ. އޭގެ ތެރޭގައި ކުރިން ވަޒީރުކަން ކުރެއްވި ފަސް ބޭފުޅުން ހިމެނިވަޑައިގަންނަވައެވެ. ނަމަވެސް ރާޖަޕަކްސަ ޢާއިލާއަށް ނިޞްބަތްވާ އެއްވެސް މީހަކު އަލަށް އެކުލަވާލި ވަޒީރުންގެ މަޖިލީހުގައި ނުހިމެނެއެވެ.
ސުރީ ލަންކާގެ ވަޒީރުންގެ މަޖިލީހަށް އައު މެންބަރުން ޢައްޔަންކޮށްފައިވަނީ އެ ޤައުމަށް ކުރިމަތިވެފައިވާ ނާޒުކު އިޤްތިޞާދީ ޙާލަތުން އަރައިގަތުމަށް ބައިނަލްއަޤްވާމީ މާލީ އިދާރާއާ މަޝްވަރާކުރުމަށް ތައްޔާރުވަމުންދާ ދަނޑިވަޅެއްގައެވެ.