ޕާކިސްތާނުގެ އަސްކަރިއްޔާއިން އަފްޣާނިސްތާނަށް ވަރުގަދަ ވައިގެ ޙަމަލާތަކެއް ދިނުމުން އެ ޤައުމުގައި ވެރިކަންކުރާ ޠާލިބާން ޖަމާޢަތުން ރުޅިވެރިކަން ފާޅުކޮށްފިއެވެ.
އަފްޣާނިސްތާނުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ އެ ޤައުމަށް ޕާކިސްތާނުން ކަނޑައަޅާފައިވާ ސަފީރު އެ ވުޒާރާއަށް ހާޒިރުކޮށް ޕާކިސްތާނުގެ އަސްކަރިއްޔާއިން އަފްޣާނިސްތާނަށް ޙަމަލާދޭން ޖެހުނު ސަބަބު އޮޅުންފިލުވާފައިވާނެކަމަށެވެ. އަދި އެފަދަ ޙަމަލާތައް ދޭނަމަ އަފްޣާނިސްތާނާއި ޕާކިސްތާނާ ދެމެދު އޮންނަ ގުޅުމަށް އަސަރުކުރާނެކަމަށާއި ބޮޑު ކުރިމަތިލުމެއް ފެށިދާނެކަން ސަފީރަށް އަންގާފައިވާނެކަމަށްވެސް އެ ބަޔާނުގައި ބުނެފައިވެއެވެ. ނަމަވެސް އެ ބަޔާނުގައި ޕާކިސްތާނުގެ އަސްކަރިއްޔާއިން އަފްޣާނިސްތާނަށް ދިން ޙަމަލާގެ އެއްވެސް ތަފްޞީލެއް ހިމަނާފައެއް ނުވެއެވެ.
މަޢުލޫމާތު ލިބިފައިވާ ގޮތުގައި ޕާކިސްތާނުގެ އަސްކަރިއްޔާއިން ވަރުގަދަ ވައިގެ ޙަމަލާތަކެއް ދީފައިވަނީ އަފްޣާނިސްތާނުގެ ހުޅަނގުދެކުނުގައި އޮންނަ އެންމެ ބޮޑު ރަށްކަމަށްވާ ޚޫސްތަށެވެ. އެ ޙަމަލާތަކުގައި 36 މީހުން މަރުވެފައިވެއެވެ. ނަމަވެސް ޕާކިސްތާނުން ބުނެފައިވަނީ އަފްޣާނިސްތާނުގެ ވައިގެ ސަރަޙައްދަށް ވަދެ އެފަދަ ޙަމަލާއެއް ދީފައިނުވާނެކަމަށެވެ. ޕާކިސްތާނުގެ އަސްކަރިއްޔާއިން އަފްޣާނިސްތާނަށް ވައިގެ ޙަމަލާތަކެއް ދީފައިވަނީ ހަނގުރާމަވެރި ޖަމާޢަތަކުން ދިން ޙަމަލާއެއްގައި ޕާކިސްތާނުގެ ސިފައިން ހަތް މީހުން މަރުވެފައިވަނިކޮށެވެ.
އެމެރިކާއިން ޠާލިބާނުންނާ ދެކޮޅަށް ކުރި 20 އަހަރުގެ ހަނގުރާމާގައި މުޙިއްމު ދަޢުރެއް ޢަދާކުރި ނަމަވެސް ޠާލިބާނުންނާއި ޕާކިސްތާނާ ދެމެދު ގާތްގުޅުމެއް އަބަދުވެސް އޮވެއެވެ. ނަމަވެސް ޕާކިސްތާނުގެ ބަލޫޗިސްތާނުގައި ޙަރަކާތްތެރިވާ ހަނގުރާމަވެރި ޖަމާޢަތްތަކުން ޕާކިސްތާނުގެ އަސްކަރިއްޔާއާ ކުރިމަތިލުމަށް ބޭނުންކުރަނީ އަފްޣާނިސްތާނުގެ ސަރަޙައްދުތަކެވެ. ޠާލިބާނުން ބުނެފައިވާ ގޮތުގައި އެފަދަ ޖަމާޢަތްތަކުން އަފްޣާނިސްތާނާއި ޕާކިސްތާނާ ގުޅޭ ސަރަޙައްދުގައި ޙަރަކާތްތެރިވުން ހުއްޓުވުމަށް ފިޔަވަޅުތަކެއްވަނީ އަޅައިފައެވެ. ފާއިތުވި ދުވަސްތަކުގައި އަފްޣާނިސްތާނުގެ ސަރަޙައްދީ ރޮނގު ކައިރީގައި ޕާކިސްތާނުގެ އަސްކަރީ ޙަރަކާތްތައްވަނީ އިތުރުކޮށްފައެވެ.