ސުރީ ލަންކާގެ އިޤްތިޞާދު ނާޒުކު ޙާލަތަކަށް ވެއްޓިފައިވަނިކޮށް އެ ޤައުމުގެ ޤައުމީ އެއަރލައިނުން އިތުރު މަތިންދާބޯޓުތަކެއް ހޯދަން އިޢުލާންކުރުމުން އެ ޤައުމުގެ ސަރުކާރަށް އިތުރު ފާޑުކިޔުންތަކެއް ޢަމާޒުވެއްޖެއެވެ.
ސުރީ ލަންކާގެ ދަރަނި އިންތިހާއަށް އިތުރުވެ އެ ޤައުމުގެ ރިސާވު %70 ދަށަށް ގޮސް ޢާއްމުންނަށް ބޭނުންވާ ކާޑުގެ ބާވަތްތަކާއި ބޭހާއި ތެޔޮ އެތެރެކުރާނެ ފައިސާ ނެތް ދަނޑިވަޅެއްގައި ސުރީ ލަންކަން އެއަރލައިންސުންވަނީ އިތުރު 42 މަތިންދާބޯޓު ކުއްޔަށް ނެގުމަށް އިޢުލާންކޮށްފައެވެ. ގިނަ ޢަދަދެއްގެ މަތިންދާބޯޓު ހޯދުމަށް ސުރީ ލަންކަންނުން އިޢުލާންކޮށްފައިވަނީ ކޯވިޑް-19ގެ ސަބަބުން އެ ޤައުމުގެ ސަރަޙައްދީ ރޮނގުތައް ގިނަ ދުވަސްތަކަކަށް ބަންދުކުރުމުގެ ސަބަބުން ފަތުރުވެރިކަމުގެ ސިނާޢަތް ހުއްޓުމަކަށް އައިސްފައިވަނިކޮށެވެ. އެ ގޮތުން ސުރީ ލަންކަންނުން އެންމެ ފަހުން ޢާއްމުކޮށްފައިވާ ތަފާސްހިސާބުތަކުން ދައްކައި ގޮތުގައި އެ އެއަރލައިނަށްވަނީ ކޯވިޑް-19ގެ ފުރަތަމަ އަހަރުގެ ތެރޭގައި 140 މިލިޔަން އެމެރިކާ ޑޮލަރުގެ ގެއްލުމެއް ލިބިފައެވެ.
ސުރީ ލަންކަން އެއަރލައިންސުން ބުނެފައިވަނީ އިތުރު 42 މަތިންދާބޯޓު ހޯދަނީ އެއްފަހަރާ ނޫންކަމަށާއި އެންމެ ފުރަތަމަ ހޯދުމަށް މަސައްކަތްކުރަނީ 21 މަތިންދާބޯޓުކަމަށާއި އެއީ 2021-2025އަށް އެކުލަވާލާފައިވާ ވިޔަފާރީގެ މަގުޗާޓާ އެއްގޮތަށް ހޯދުމަށް މަސައްކަތްކުރާ މަތިންދާބޯޓުތަކެއްކަމަށެވެ. އަދި އެ މަތިންދާބޯޓުތައް ހޯދަނީ ބާވެ ހަލާކުވެފައިވާ މަތިންދާބޯޓުތަކުގެ ބަދަލުގައިކަމަށްވެސް އެ އެއަރލައިނުން ބުނެފައިވެއެވެ. އޭގެ އިތުރުން އެ މަތިންދާބޯޓުތަކަށް ފައިސާދެއްކުމަށް ސަރުކާރުގެ އެހީއެއް ބޭނުންނުވާކަމަށާއި ދަރަނިތައް ދައްކާނީ އަމިއްލައަށްކަމަށްވެސް އެ އެއަރލައިނުންވަނީ ބުނެފައެވެ.
ސުރީ ލަންކާގެ އިޤްތިޞާދީ ޙާލަތު ގޯސްވެފައިވަނީ ސަރުކާރުގެ ދޯދިޔާ ސިޔާސަތުތަކުންކަމަށް ބުނެ އެ ޤައުމުގައި ހުއްޓާނުލައި މުޒާހަރާކުރަމުންދާތާވަނީ ހަފުތާއެއްވެފައެވެ.