ބާޒާރުގައި ލުނބޯގެ އަގު ދަށަށް

ބާޒާރުގައި ލުނބޯގެ އަގު ދަށަށް ހިނގައްޖެއެެވެ.

މި ރޯދަމަސް ފެށިގެން އައި އިރު ބާޒާރުގައި އެންމެ ބޮޑަށް އަގު އުފުލިފައި ހުރީ ލުނބޯގެއެވެ. އެގޮތުން އޭރު ލުނބޯ ކިލޯއެއްގެ އަގުހުރީ، 120ރ އާއި 140ރ އާއި ދެމެދުގެ އަގުތަކެއްގައެވެ. އަދި މިނިމުނު ހަފްތާތެރޭވެސް އަގުތައް ހުރީ 90ރ އާއި 120ރ އާއި ދެމެދުގެ އަގުތަކެއްގައެވެ.

ނަމަވެސް މިއަދު ބާޒާރުގައި ލުނބޯ ވަރަށް ތިޔާޤިއެވެެ. އަދި މިއާއެކު އަގުތައްވަނީ ދަށަށް ގޮސްފައެވެ. ދަތުރުވެރިންގެ މާރުކޭޓުގައި މިއަދު ލުނބޯ ކިލޯއެއްގެ އަގު ހުރީ 70ރ އާއި 80ރ އާއި ދެމެދުގެ އަގުތަކެއްގައެވެ.

ބާޒާރުގައި ތަކެތި ވިއްކާ ފަރާތްތަކުން ބުނީ މިހާރު ބާޒާރަށް ގިނަ އަދަދަކަށް ލުނބޯ ލިބެމުންދާ ކަމަށެވެ. އަދި ރޯދަމަހުގެ ކުރިއަށް އޮތް ދުވަސްތަކުގައި ލުނބޯގެ އަގުތައް ދަށަށް ދާނެ ކަމަށް ވިޔަފާރިވެރިން ލަފާކުރެއެވެ.

ލުނބޯގެ އިތުރުން މިރުހަކީވެސް ރޯދަމަސް ފެށުނު އިރު އަގު އުފުލިފައި ހުރި ބާވަތެކެވެ. އެގޮތުން ބާޒާރުގައި 100 ގްރާމް މިރުސް ހުރީ 90ރ އާއި 75ރ އާއި ދެމެދުގެ އަގުތަކެއްގައެވެ. އެހެން ނަމަވެސް މިހާރު ބާޒާރުގައި މިރުހުގެ އަގު ހުރީ 100 ގްރާމް މިރުސް 45ރ އާއި 35ރ އާއި ދެމެދުގެ އަގުތަކެއްގައެވެ.

މިރުސް ވިއްކާ ފަރާތްތަކުން ލަފާ ކުރާގޮތުގައި ރޯދަމަހުގެ ކުރިއަށް އޮތް ދުވަސްތަކުގައި މިރުހުގެ އަގު އެހާ ބޮޑަށް އުފުލިގެނެއް ނުދާނެއެވެ.

ދަތުރުވެރިންގެ މާރުކޭޓަށް ބަލާލާއިރު ފަނި ގިރުމަށް ބޭނުންކުރާ ތަފާތު އެކި ބާވަތްތައް ލިބެން އެބަ ހުއްޓެވެ. އެގޮތުން ބާޒާރުގައި މިދުވަސްކޮޅު ދިވެހި އަނބު ތިޔާޤިއެވެ. ދިވެހި އަނބު ކިލޯއެއް މިއަދު ހުރީ ކިލޯއެއް 100ރ އަށެވެ. މީގެ އިތުރަށް ފެޝަން ފުރުޓާއި، ކަރާ އަދި ކުރުނބާ ފަދަ ބާވަތްތައްވެސް ބާޒާރުގައި ތިޔާގިއެވެ.