ކުރިޔަށް އޮތް ދުވަސްތަކުގެ ތެރޭގައި ރަޝިޔާގެ ވަރުގަދަ ޙަމަލާތަކަކާ ޔޫކްރެއިނުން ކުރިމަތިލާން ޖެހޭނެކަމުގެ އިންޒާރު ޗެޗުނިޔާގެ އެންމެ އިސްވެރިޔާ ރަމަޒާން ކަދީރޯފު ދެއްވައިފިއެވެ.
ޔޫކްރެއިނުގައި ކުރަމުންދާ ހަނގުރާމައިގައި ރަޝިޔާގެ ފައުޖުތަކާއެކު ޙަރަކާތްތެރިވަމުންދާ ކަދީރޯފު ޢާއްމު ކުރެއްވި ވީޑިޔޯއެއްގައި އޭނާ ވިދާޅުވެފައިވަނީ ޔޫކްރެއިނުގެ ބޮޑެތި ރަށްތަކަށް ރަޝިޔާއިން ވަރުގަދަ ޙަމަލާތަކެއް ވަރަށް އަވަހަށް ދޭން ފަށާނެކަމަށެވެ. އަދި އެ ޙަމަލާތަކުގައި ޔޫކްރެއިނުގެ ވެރިރަށް ކިޔޭވާއި އެ ނޫންވެސް މުޙިއްމު ރަށްތައް ރަޝިޔާގެ ބާރުގެ ދަށަށް ގެންނާނެކަމަށް އޭނާ ވިދާޅުވިއެވެ. ނަމަވެސް އޭގެ ކުރިން ޔޫކްރެއިނުގެ އިރުމަތީގައި އޮންނަ ދޮންބާސްގެ ދެ ދަޢުލަތްކަމަށްވާ ދޮންޔެސްކާއި ލުހާންސްކު މިނިވަންކުރާނެކަމަށާއި ޔޫކްރެއިނާ ދެކޮޅަށް ކުރަމުންދާ ހަނގުރާމާގައި އެންމެ ފިޔަވަޅެއްވެސް ފަހަތަށް ނުޖެހޭނެކަމުގެ ޔަޤީންކަން އޭނާ ދެއްވިއެވެ.
ފެބްރުއަރީ މަހުގެ 24ވަނަ ދުވަހުން ފެށިގެން ޔޫކްރެއިނުގައި ކުރަމުންދާ ހަނގުރާމާގައި ޗެޗުނިޔާގެ އެންމެ ޒަމާނީ ފައުޖުތަކުން ދަނީ ޙަރަކާތްތެރިވަމުންނެވެ. މީގެ ކުރިންވެސް ޗެޗުނިޔާގެ ފައުޖުތައްވަނީ ރަޝިޔާގެ ފައުޖުތަކާއެކު ޖޯޖިޔާއާއި ސޫރިޔާގައި ޙަރަކާތްތެރިވެފައެވެ. ޗެޗުނިޔާގެ މުސްލިމުންނަކީ ރަޝިޔާގެ ދެކުނުގެ ސަރަޙައްދުތައް ދިފާޢުކުރުމުގައި މުޙިއްމު ދަޢުރެއް އަދާކުރާ ބައެކެވެ.
1990ގެ އަހަރުތަކުގައި ޗެޗުނިޔާގެ މުސްލިމުންވަނީ މިނިވަންކަން ހޯދުމަށް ރަޝިޔާއާ ދެކޮޅަށް ދެ ފަހަރެއްގެ ހަނގުރާމަކޮށްފައެވެ. ނަމަވެސް ފަހުން ރަޝިޔާއާ ޞުލްހަވެ ޗެޗުނިޔާގައި ސަރަޙައްދީ ސަރުކާރެއް ޤާއިމުކުރިއެވެ. އަދި ރަޝިޔާއިންވަނީ ޗެޗުނިޔާ އާރާސްތުކުރުމަށް ބޮޑު ޚަރަދެއްކޮށްފައެވެ.