ﷲ ސުބުހާނަހޫ ވަތައާލާއާ އެކުގައި މީހަކު ވާން ބޭނުންނަމަ އެމީހަކު ވާންޖެހޭނީ އެންމެ ހައްގުގޮތުގައި އިމާންވާ މީހަކަށް ކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރަމަޟާންމަހުގެ ރޭތައް އިހްޔާ ކުރުމަށް މިރޭ އިސްލާމީ މަރުކަޒުގައި ބޭއްވި ފޯރަމްގައި ތަޤްރީރު ކުރައްވަމުންނެވެ.
މިރޭގެ ފޯރަމްގައި މިނިސްޓަރ ތަޤުރީރް ކުރެއްވީ "ތިބާ ﷲއާއެކު ވާށެވެ." މިމައުޟޫޢަށެވެ. މިމަޢުޟޫއަށް ވާހަކަފުޅުދައްކަވަމުން މިނިސްޓަރ ވިދާޅުވީ ﷲ ސުބުހާނަހޫ ވަތައާލާގެ ގާތުގައި ވާން އެދޭނަމަ، އަދި އެއިލާހުގައެ ލޯބި ލިބެން އެދޭނަމަ އެއިލާހުގެ އެންގެވުންތަކަށް އެންމެ ފުރިހަމަ ގޮތުގައި އިޖާބަ ދޭން ޖެހޭ ކަމަށެވެ. ހަމައެހެންމެ ﷲއާ އެކުގައިވާ އަޅުންނަކީ އެންމެ ހެޔޮގޮތުގައި ﷲއަށް ވަކީލުކުރާ އަޅުންނަށް ވާންޖެހޭކަމަށެވެ. އަދި ވަކީލުކުރުމުގައި އޭގެ އެންމެމަތީ ދަރަޖައަށްދާ އަޅުންނަށްވާންޖެހޭ ކަމަށެވެ. މިމޭރުމުން ވާހަކަފުޅު ކުރިއަށް ގެންދަވަމުން ރަސޫލުންނާއި، ނަބީންގެ ކިބައިން ވަރަށް މަތިވެރި މިސާލުތައް ފެންނަ ކަން ފާހަގަ ކުރައްވާ މިނިސްޓަރވަނީ މިކަމުން މިސާލުތައް ނަންގަވާ ވާހަކަފުޅުދައްކަވާފައެވެ.
މިފޯރަމްގައި މިނިސްޓަރ އިމްރާންގެ އިތުރުން އައްޝައިޚް ޢަބްދުﷲ ރަޝީދުވެސްވަނީ ތަޤުރީރުކުރައްވާފައެވެ.
އިހްޔާގެ މިފޯރަމް އަޑުއެއްސެވުމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމްވަނީ ވަޑައިގެންފައެވެ.