ރަޝިޔާއާއި ޔޫކްރެއިނާ ދެމެދު ހަނގުރާމައިގެ އަސީރުން ބަދަލުކޮށްފިއެވެ.
ރަޝިޔާގެ އިންސާނީ ޙައްޤުތަކާބެހޭ އެންމެ އިސްވެރިޔާ ތާތިޔާނާ މޮސްކަލްކޯވާ ވިދާޅުވީ އެ ޤައުމުގެ އެޓޮމިކް ހަކަތަކައާބެހޭ ކުންފުންޏަށް ނިޞްބަތްވާ ހަތަރު މުވައްޒަފަކާއި ސިފައިންނާއި ޢާއްމުން އެ ޤައުމަށް އަނބުރާ އައިސްފައިވާކަމަށެވެ. އޭގެ ތެރޭގައި ރަޝިޔާއަށް ނިޞްބަތްވާ 32 ޑުރައިވަރުންނާއި އަވަށްޓެރި ބެލަރޫސަށް ނިޞްބަތްވާ ޢާއްމުން ހިމެނޭކަމަށް އޭނާ ވިދާޅުވިއެވެ. ބަދަލުގައި ޔޫކްރެއިނަށް ނިޞްބަތްވާ 20 ޑުރައިވަރުންނާއި 12 ސިފައިންނާއި ޢާއްމުންގެ 14 މީހުން އެ ޤައުމަށް ފޮނުވާލާފައިވާކަމަށްވެސް އޭނާ ވިދާޅުވިއެވެ.
ރަޝިޔާއާއި ޔޫކްރެއިނާ ދެމެދު ހަނގުރާމައިގެ އަސީރުން ބަދަލުކޮށްފައިވަނީ ފާއިތުވި ހަތް ހަފުތާގެ ތެރޭގައި އެ ޤައުމުގައި ކުރަމުންދާ ހަނގުރާމައަށް ބޮޑެތި ބަދަލުތަކެއް އައިސްފައިވާ ދަނޑިވަޅެއްގައެވެ. އެ ގޮތުން ޔޫކްރެއިނުގެ އުތުރުގެ ސަރަޙައްދުތަކުން ރަޝިޔާގެ ފައުޖުތައް ފަހަތަށް ޖެހި އެ ޤައުމުގެ އިރުދެކުނު ސަރަޙައްދުތަކަށް ދެމުންދާ ޙަމަލާތައްވަނީ ވަރަށް ބޮޑަށް އިތުރުކޮށްފައެވެ. އެ ޙަމަލާތަކުގައި ޔޫކްރެއިނުގެ މެދުތެރޭގައި އޮންނަ މުޙިއްމު ރަށެއްކަމަށްވާ ދިނިޕުރޯގެ ވައިގެ ބަނދަރުވަނީ ބޭނުންނުކުރެވޭ ވަރަށް ހަލާކުކޮށްލައިފައެވެ.