އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން، އެސްޑީއެފްސީގެ "ދަނޑުވެރި ނަފާ" ލޯނާއި "ވިޔަފާރި އެހީ" ލޯނަށް އެދި ހުށަހެޅުމުގެ ފުރުސަތު އަލުން ހުޅުވާލައިފިއެވެ.
މިއީ ކުދި ވިޔަފާރިތަކަށް ޙާއްސަކޮށްގެން ކުދި އަދި މެދު ފަންތީގެ ވިޔަފާރިތަކަށް އަމާޒުކޮށްގެން ދޫކުރާ ލޯން ސްކީމެކެވެ.
އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީން) ބުނީ ދަނޑުވެރިކަމަށް ދޫކުރާ "ދަނޑުވެރި ނަފާ" ލޯނާއި "ވިޔަފާރި އެހީ" ލޯނަށް އެދި މިއަދުން ފެށިގެން ފޯމު ލެވޭނެކަމަށެވެ. އަދި މި ލޯނުތަކަށް އެދި ހުށަހަޅާ ފޯމުތައް މިއަދުން ފެށިގެން ބަލައިގަތުމަށް ހަމަޖެހިފައިވާއިރު އެހެނިހެން ލޯނުތަކަށް އެދުމުގެ ފުރުސަތު އަންނަ މެއި މަހުން ފެށިގެން ހުޅުވާލާނެކަމަށްވެސް އެސްޑީއެފްސީން ބުންޏެވެ.
"ދަނޑުވެރި ނަފާގެ" ލޯނަކީ އެކުންފުންޏާއި ފިޝަރީސް މިނިސްޓްރީ ގުޅިގެން ރާއްޖޭގައި ދަނޑުވެރިކަން ކުރާ ފަރާތްތަކަށް އެހީތެރިވުމުގެ ގޮތުން ދޫކުރަމުންދާ ލޯނެކެވެ. "ވިޔަފާރި އެހީގެ" ލޯނަކީ ކުރު މުއްދަތެއްގެ ތެރޭގައި ކުދި ވިޔަފާރިތަކަށް ބޭނުންވާ މާލީ އެހީ ފޯރުކޮށްދިނުމަށްދޭ ލޯނެކެވެ.
އެ ލޯނުތަކަށް ކުރިމަތިލާން ބޭނުންވާ ވިޔަފާރިތަކަށް އެސްޑީއެފްސީގެ ވެބްސައިޓުން ފޯމު ލިބެން ހުންނާނެއެވެ. އަދި އެ ވެބްސައިޓުގެ ކަސްޓަމާ ޕޯޓަލް މެދުވެރިކޮށް ފޯމް ހުށަހެޅޭނެއެވެ.
އެސްޑީއެފްސީގެ މައިގަނޑު މަޤްޞަދަކީ ދިވެހިރާއްޖޭގައި އަލަށް އުފައްދާ އަދި ކުރިއަރަމުން އަންނަ ކުދި ވިޔަފާރި އަދި މެދު ފަންތީގެ ވިޔަފާރިތަކަށް ބޭނުންވާނެ މާލީ އެހިތެރިކަން ފޯރުކޮށްދިނުމެވެ. އެގޮތުން ތަފާތު އިޤްތިޞާދީ ދާއިރާތަކަށް އަމާޒުކޮށް ލުއިގޮތަކަށް ލިބޭނޭ ލޯނު ތައާރަފްކޮށް އެމަސައްކަތް ދެމެހެއްޓެނިވި ގޮތެއްގައި ކުރިޔަށް ގެންދިޔުމުގެ މަސައްކަތް އެސްޑީއެފްސީން ދަނީ ކުރަމުންނެވެ.