އީރާނުގެ ނިޔުކްލިޔަރ މަޝްރޫޢު ހުއްޓާލުމުގެ އެއްވެސް ވިސްނުންފުޅެއް ނުގެންގުޅުއްވާކަމަށް އެ ޤައުމުގެ ރައީސް އިބްރާހީމު ރައީސީ ވިދާޅުވެއްޖެއެވެ.
އީރާނުގެ ނިޔުކްލިޔަރ ޓެކްނޮލޮޖީ ދުވަހުގެ މުނާސަބަތުގައި ދެއްވި ހިޠާބެއްގައި ރައީސީ ވިދާޅުވީ ނިޔުކްލިޔަރ ޤާބިލުކަން ހޯދުމަކީ އެ ޤައުމުގެ ރައްޔިތުންނަށް ލިބިފައިވާ ޙައްޤެއްކަމަށެވެ. އަދި ނިޔުކްލިޔަރ ޤާބިލުކަން އެ ޤައުމުން ހޯދުމަށް މަސައްކަތްކުރަނީ ޞުލްހަވެރި ބޭނުންތަކަށްކަމަށާއި އެ ނިންމުމަށް ހުރިހާ ޤައުމަކުންވެސް އިޙްތިރާމުކުރަން ޖެހޭކަމަށް ރައީސީ ވިދާޅުވިއެވެ. އެ ގޮތުން އެ ޤައުމުގެ ނިޔުކްލިޔަރ މަޝްރޫޢުއަކީ އެއްވެސް އެއްބަސްވުމެއްގެ ދަށުން މުޅިން ހުއްޓާލާނެ މަޝްރޫޢުއެއް ނޫންކަން އެ ޤައުމުތަކުން ޤަބޫލުކުރުން މުޙިއްމުކަމަށްވެސް އޭނާ ވިދާޅުވިއެވެ.
2015ވަނަ އަހަރުގެ ތެރޭގައި ދުނިޔޭގެ ބާރުތަކާއެކު އީރާނުން ސޮއިކުރި ނިޔުކްލިޔަރ އެއްބަސްވުން އަލުން އިޔާދަކުރުމަށް ފާއިތުވި 11 މަސްދުވަހު އޮސްޓުރިޔާގެ ވެރިރަށް ވިއޭނާގައިވަނީ ގިނަ މަޝްވަރާތަކެއްކޮށްފައެވެ. ނަމަވެސް އެ މަޝްވަރާތައް ނިމުމަކާ ހަމައަށް އައިސް އައު އެއްބަސްވުމެއް އެކުލަވާލުމާ ގާތްވެފައިވަނިކޮށް ޔޫކްރެއިނުގައި ރަޝިޔާއިން ކުރަމުންދާ ހަނގުރާމައިގެ ހިޔަނިވަނީ އެ މަޝްވަރާތަކަށް އެޅިފައެވެ. ރަޝިޔާއަކީ އީރާނާއެކު ނިޔުކްލިޔަރ އެއްބަސްވުމެއް ޤާއިމުކުރުމަށް ކުރަމުންދާ މަޝްވަރާތަކުގައި ބައިވެރިވާ މުޙިއްމު ޤައުމެކެވެ.
އީރާނާއެކު ނިޔުކްލިޔަރ އެއްބަސްވުމެއް ޤާއިމުކުރުމަށް މަޝްވަރާކުރަމުންދާ ޤައުމުތަކުގެ ތެރޭގައި ހިމެނެނީ އދގެ ސަލާމަތީ މަޖިލީހުގެ ދާޢިމީ ފަސް މެންބަރުންނާއި ވިލާތުގެ އިއްތިޙާދުގެ ޤައުމުތަކެވެ. އެ އެއްބަސްވުމުގެ ދަށުން އީރާނަށް ނިޔުކްލިޔަރ ހަތިޔާރު ނުއުފެއްދޭނެކަން ޔަޤީންކުރާނެއެވެ. ނަމަވެސް ޞުލްޙަވެރި ބޭނުންތަކަށް ނިޔުކްލިޔަރ ހަކަތަ އީރާނަށް އުފެއްދޭނެއެވެ. ބަދަލުގައި ދުނިޔޭގެ ބާރުތަކުން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލާނެއެވެ.