2008ވަނަ އަހަރުގެ ތެރޭގައި އިންޑިޔާގެ ވިޔަފާރީގެ މައި މަރުކަޒުކަމަށްވާ މުންބާއީއަށް ދިން ޙަމަލާގެ އެންމެ އިސް މޭސްތިރިކަމަށްވާ ޙާފިޒު ސަޢީދު އިތުރު 31 އަހަރަށް ޖަލަށްލުމަށް ޕާކިސްތާނުގެ ކޯޓަކުން ޙުކުމުކޮށްފިއެވެ.
2020ވަނަ އަހަރުން ފެށިގެން ޖަލު ޙުކުމެއް ތަންފީޒުކުރަމުންދާ ޙާފިޒު ސަޢީދުގެ މައްޗަށް އެންމެ ފަހުން ކުރި ޙުކުމުގައި ބުނެފައިވަނީ މުންބާއީއަށް ޙަމަލާދިނުމަށް ބޭނުންވާ ފައިސާ ހަމަޖައްސާފައިވަނީ އޭނާކަމަށެވެ. ޕާކިސްތާނުން ޙާފިޒު ސަޢީދުގެ މައްޗަށް އިތުރު ޖަލު ޙުކުމެއް އިއްވާފައިވަނީ ހަނގުރާމަވެރި ޖަމާޢަތްތަކާ ދެކޮޅަށް އެކަށީގެންވާ ގޮތެއްގައި އެ ޤައުމުގެ ސަރުކާރުން ފިޔަވަޅުނާޅާކަމަށް ބުނެ ބޮޑެތި ތުޙުމަތުތަކެއް އިންޑިޔާއާއި އެމެރިކާއިން ކުރަމުންދަނިކޮށެވެ. 2020ވަނަ އަހަރުގެ ތެރޭގައި ޙާފިޒު ސަޢީދު ޖަލަށްލުމުގެ ކުރިން އެކި ފަހަރުގެމަތިން އޭނާވަނީ ޖަލަށްލުމަށްފަހު މިނިވަންކޮށްފައެވެ. އެކަމުގެ ސަބަބުން އިންޑިޔާއާއި ޕާކިސްތާނުގެ ޚާރިޖީ ގުޅުންތަކަށްވެސް ބުރޫއަރާފައިވެއެވެ. އަދި ޕާކިސްތާނަށް ދެމުންދާ މާލީ އެހިތެރިކަން އެމެރިކާއިންވަނީ އެކި ފަހަރުގެމަތިން މަޑުޖައްސާލައިފައެވެ.
ޢުމުރުން 71 އަހަރުގެ ޙާފިޒު ސަޢީދަކީ ޕާކިސްތާނުގައި ޙަރަކާތްތެރިވާ ހަނގުރާމަވެރި ޖަމާޢަތެއްކަމަށްވާ ލަޝްކަރޭ ޠައިބާގެ ބާނީއެވެ. 2008ވަނަ އަހަރުގެ ތެރޭގައި ލަޝްކަރޭ ޠައިބާއިން މުންބާއީގެ އެކި ސަރަޙައްދުތަކަށް ދިން ވަރުގަދަ ޙަމަލާތަކުގައި 175 މީހުން މަރުވެ 300 މީހުން ޒަޚަމުވިއެވެ. އޭގެ ކުރިން 2001ވަނަ އަހަރުގެ ތެރޭގައި އެ ޖަމާޢަތުންވަނީ އިންޑިޔާގެ ޤާނޫނުހަދާ މަޖިލިސްކުރާގެއަށްވެސް ވަރުގަދަ ޙަމަލާއެއް ދީފައެވެ.