ދީނީ އިލްމުވެރިންނާ ބައްދަލުވެ، ސުވާލުކުރުމުގެ ފުރުޞަތާއެކު ބާއްވާ އައުޓްރީޗް ޕްރޮގްރާމް މިއަދު ހަވީރު ހުޅުމާލޭގައި އޮންނާނެއެވެ.
މި ޕްރޮގްރާމް އޮންނާނީ ހުޅުމާލޭ ސެންޓްރަލް ޕާކުގައި މިއަދު ހަވީރު 04:00 އިން 17:30އަށެވެ.
މި ޕްރޮގްރާމްގެ މަޤުސަދަކީ އެކުވެރި ހިތްފަސޭހަ މާޙައުލެއްގައި ތިބެ، ދީނީ މަޢުލޫމާތު ހޯދުމުގެ މަގު ފަހިކޮށްދިނުމެވެ.
ޕްރޮގްރާމްގައި ދީނީ އިލްމުވެރިންނާ ބައްދަލުވެ ސުވާލުކުރުމުގެ ފުރުޞަތުގެ އިތުރުން، ދީނީ ތަފާތު މަޢުލޫމާތާއި، ދީނީ ފޮތްތަކާއި، މުސްޙަފް، މި ޕްރޮގްރާމުން ލިބިގެން ދާނެއެވެ. އަދި މި ޕްރޮގްރާމް ކުރިއަށްދާއިރު ބައިވެރިވާ ފަރާތްތަކުގެ ތެރެއިން ކުޑަކުދިންނަށް ޚާއްސަ ތަފާތު ކުޅިވަރުތަކާއިއެކު ހަދިޔާވެސް ލިބިގެންދާނެއެވެ. ކުރިއަށްދާ ކުޅިވަރުތަކުގެ ތެރޭގައި ސްނޭކް އެންޑް ލެޑަރއާއި ޕްލޭ ބޯލް، ކުރެހުން އަދި ކުލަ ޖެއްސުންވެސް ހިމެނެއެވެ.
ކޮންމެ ހޮނިހިރު ދުވަހެއްގެ ހަވީރު ބާއްވާ މި ޕްރޮގްރާމް، ގްރޭޓަރ މާލެ ހިމެނޭ އެކި ސަރަޙައްދުތަކުން ކުރިއަށްގެންދާނެއެވެ. މީގެ ފުރަތަމަ ޕްރޮގްރާމް ބާއްވާފައިވަނީ މިދިޔަ ހޮނިހިރު ދުވަހު މާލޭގެ ސަލްޓަން ޕާކު ސަރަޙައްދުގައެވެ.
މިއަހަރުގެ ރަމަޟާންމަހަށް އިސްލާމިކް މިނިސްޓްރީން ވަނީ ގިނަ ދީނީ ހަރަކާތްތަކެއް ރާވާފައެވެ. އައުޓްރީޗް ޕްރޮގްރާމްގެ އިތުރުން ދީނީ ސުވާލާއި ޖަވާބު ޕްރޮގްރާމާއި ކުޑަކުދިންނަށް ޚާއްސަ ދީނީ ޕްރޮގްރާމްތަކާއި ދަރުސްތައް ހިމެނެއެވެ.