އެމެރިކާގެ ސުޕުރީމު ކޯޓަށް ފުރަތަމަ ފަހަރަށް ކަޅު ނަޞްލުގެ އަންހެނެއް

އެމެރިކާގެ ސުޕުރީމު ކޯޓަށް ފުރަތަމަ ފަހަރަށް ކަޅު ނަޞްލުގެ އަންހެނެއް ޢައްޔަންކޮށްފިއެވެ.

ޢުމުރުފުޅުން 51 އަހަރުގެ ކެތާންޖީ ބުރައުން ޖެކްސަން ސުޕުރީމު ކޯޓަށް ޢައްޔަންކޮށްފައިވަނީ އެމެރިކާގެ ޤާނޫނުހަދާ މަޖިލީހުގެ މަތިގޭގެ 53 މެންބަރުންގެ ވޯޓުންނެވެ. އޭގެ ތެރޭގައި އިދިކޮޅު ރިޕަބްލިކަން ޕާޓީގެ ތިން މެންބަރުންގެ ވޯޓުވެސް ހިމެނެއެވެ. އޭނާއާ ދެކޮޅަށް ދީފައިވަނީ 47 ވޯޓެވެ.

އެމެރިކާގެ އެންމެ މަތީ ކޯޓަށް ތަފާތު ނަޞްލުތަކަށް ނިޞްބަތްވާ ބޭފުޅުން ޢައްޔަންކުރެއްވުމަކީ އެމެރިކާގެ ރައީސް ޖޯ ބައިޑަންގެ ރިޔާސީ ވަޢުދެކެވެ. ކެތާންޖީ ސުޕުރީމު ކޯޓުގެ ފަނޑިޔާރުކަމުގެ ހުވައި ކުރައްވާނީ އަންނަ ޖޫން މަހުގެ ތެރޭގައެވެ.

1789ވަނަ އަހަރުގެ ތެރޭގައި އެމެރިކާގައި ސުޕުރީމު ކޯޓެއް ޤާއިމުކުރިފަހުން 115 މީހުންވަނީ ފަނޑިޔާރުކަންކޮށްފައެވެ. ނަމަވެސް އޭގެ ތެރެއިން ކަޅު ނަޞްލަށް ނިޞްބަތްވަނީ އެންމެ ތިން މީހުންނެވެ. ކެތާންޖީއަކީ އެމެރިކާގެ ސުޕުރީމު ކޯޓަށް ޢައްޔަންކުރި ހަވަނަ އަންހެން ފަނޑިޔާރެވެ. އޭނާއާއެކު އެ ކޯޓުގައި ހަތަރު އަންހެން ފަނޑިޔާރުން ތިބޭނެއެވެ.