ރައީސުލްޖުމްހޫރިއްޔާގެ އޮފީހުގެ 2020ވަނަ އަހަރުގެ މާލީ ޚަރަދުތައް ކޮށްފައިވަނީ ދަޢުލަތުގެ މާލީއްޔަތު ގަވައިދާ އެއްގޮތައް ތެދުވެރިކަމާއެކުކަމަށް އޮޑިޓު ރިޕޯޓުން ދައްކައިފިއެވެ.
މި އޮޑިޓަކީ 2020ވަނަ އަހަރު ޑިސެމްބަރުމަހަށް ނިމުނު، މާލީ އަހަރުގެ ޚަރަދުތަކާ ގުޅޭގޮތުން ހަދާފައިވާ އޮޑިޓެކެވެ.
މި އޮޑިޓް ތައްޔާރުކޮށްފައިވަނީ ރައީސުލްޖުމްހޫރިއްޔާގެ އޮފީހާއި، ރައީސުލްޖުމްހޫރިއްޔާގެ ރަސްމީ ގެކޮޅާއި، ރައީސުލްޖުމްހޫރިއްޔާގެ ނައިބުގެ ރަސްމީ ގެކޮޅުގެ މަލީ ހިސާބުތައް ހިމަނައިގެންނެވެ.
މި މާލީ ހިސާބުތަކާ ގުޅެގޮތުން އޮޑިޓަރ ޖެނެރަލް ދެކެވަޑައިގަންނަވާގޮތް ކަމަށް ލިޔުއްވާފައިވަނީ، 2020ވަނަ އަހަރު ރައީސުލްޖުމްހޫރިއްޔާގެ އޮފީހުން ޚަރަދުތައް ކޮށްފައިވަނީ ރައްޔިތުންގެ މަޖިލީހުން އެ އޮފީހަށް ފާސްކޮށްދެއްވި ބަޖެޓާ އެެއްގޮތަށް ކަމަށެވެ. އަދި ޚަރަދުކޮށްފައިވަނީ ބަޖެޓުގައި ކަނޑައެޅުނު ކަންތައްތަކަށް، ބަޖެޓުގައި ކަނޑައެޅުނު މިންވަރަށް، ދައުލަތުގެ މާލިއްޔަތު ޤާނޫނާއި ދަޢުލަތުގެ މާލިއްޔަތު ޤަވައިދާ އެއްގޮތަށްކަމަށް އޮޑިޓަރ ޖެނަރަލް ވިދާޅުވެފައިވެއެވެ.
ރައީސް އޮފީހުން އެންމެހާ ކަންކަން މައިގަނޑުގޮތެއްގައި ހިންގާ ބަލަހައްޓާފައިވަނީ ޤާނޫނާއި ޤަވައިދާ އެއްގޮތަށްކަމަށް، އޮޑިޓަރ ޖެނެރަލް ޙުސައިން ނިޔާޒީ ސޮއިކުރައްވާ ނެރުއްވި ރިޕޯޓްގައިވެއެވެ.
2020ވަނަ އަހަރު،ރައީސުލްޖުމްހޫރިއްޔާގެ އޮފީހާއި، ރައީސުލްޖުމްހޫރިއްޔާގެ ރަސްމީ ގެކޮޅާއި، ރައީސުލްޖުމްހޫރިއްޔާގެ ނައިބުގެ ރަސްމީ ގެކޮޅުގެ އެންމެހާ މާލީ ކަންކަން ހަމަޖެއްސުމަށް 145.6 މިލިއަން ރުފިޔާގެ ބަޖެޓެއް ކަނޑައެޅިއެވެ. މީގެތެރެއިން 142 މިލިއަން ރުފިޔާ ޚަރަދުކޮށްފައިވެއެވެ.
މީގެތެރޭގައި އޮފީސް ހިންގުމާއި، މުސާރައާއި، ދަތުރުފަތުރާއި ގުޅެގޮތުން ކޮށްފައިވާ ޚަރަދުތައް ހިމެނެއެވެ. މި ރިޕޯޓްގައި 2019ވަނަ އަަހަރުގެ މާލީ އޮޑިޓްވެސް ހިމަނާފައިވެއެވެ. 2019ވަނަ އަހަރު 195.6ގެ ބަޖެޓެއްވަނީ ކަނޑައެޅިއެވެ.