ކައުންސިލްތަކަށް ޚާއްސަ ކޯލް ސެންޓަރެއް އިކޮނޮމިކް މިނިސްޓްރީން ގާއިމްކޮށްފިއެވެ. އިކޮނޮމިކް މިނިސްޓްރީން ވިދާޅުވީ، މިއީ އެ މިނިސްޓްރީން ދެމުން ގެންދާ ޚިދުމަތްތަކާ ގުޅިގެން، ކައުންސިލްތަކުން ރައްޔިތުންނަށް ފޯރުކޮށްދޭ ހިދުމަތްތައް އިތުރަށް ހަރުދަނާކުރުމަށް ޓަކައި ކައުންސިލްތަކާއި މިނިސްޓްރީ އާ ފަސޭހައިން ގުޅޭނެ އިންތިޒާމް ހަމަޖެއްސުމަށް ގާއިމްކުރި ކޯލް ސެންޓަރެއްކަމަށެވެ.
މި ކޯލްސެންޓަރު މެދުވެރިކޮށް މިނިސްޓްރީން ދެމުންގެންދާ ވިޔަފާރި ރަޖިސްޓްރީ ކުރުމުގެ ޚިދުމަތްތަކާއި ބިދޭސީންނާ ގުޅިގެން ދެމުންގެންދާ ޚިދުމަތްތަކާއި ބެހޭ މަޢޫލޫމާތު ލިބޭނެއެވެ. މިކަމަށް 4 ނަންބައެއް ވަނީ ކަނޑައަޅާފައެވެ. އެއީ 3335007، 3335770، 3335773 އަދި 3335776 އެވެ.
އިކޮނޮމިކް މިނިސްޓްރީން ވިދާޅުވީ މި ޚާއްސަ ޚިދުމަތުގެ ދަށުން ސިޓީ ކައުންސިލްތަކާއި، އަތޮޅު ކައުންސިލްތަކާއި ރަށު ކައުންސިލްތަކުގެ އިންތިޚާބު ވެފައިވާ ކައުންސިލަރުންނާއި އަންހެނުންގެ ކޮމިޓީތަކަށް ހޮވިފައިވާ ކަނބަލުންގެ އިތުރުން ކައުންސިލްތަކުގެ ޒިންމާދާރު ވެރިންގެ މޮބައިލް ފޯނުން ގުޅުމުން ބޭނުންވާ މައުލޫމަތު ލިބިގެންދާނެކަމަށެވެ.
މި ނަންބަރުތަކަށް ގުޅުމުން، ކޯލަށް ވަގުތުން ޖަވާބު ނުދެވޭ ޙާލަތެއްގައި، އެދުވަހަކު ގުޅާފައިހުރި ހުރިހާ ފަރާތްތަކަށް ދުވަސް ނިމުމުގެ ކުރިން ކޯލްސެންޓަރުން އަނބުރާ ކޯލް ރިޓާން ކޮށް ބޭނުންވާ މަޢުލޫމާތު ފޯރުކޮށްދޭނެކަމަށް މިނިސްޓްރީން ވިދާޅުވެއެވެ.