ޔޫކްރެއިނުގެ އިރުމަތީގައި އޮންނަ ދޮންބާސްގެ ދެ ދަޢުލަތުގެ ތެރެއިން ދޮންޔެސްކުން ޔޫކްރެއިނުން ވަކިވެ ރަޝިޔާއާ ގުޅުމަށް ވިސްނުން ގެންގުޅޭކަން ހާމަވެއްޖެއެވެ. މީގެ ކުރިން ދޮންބާސްގެ އަނެއް ދަޢުލަތްކަމަށްވާ ލުހާންސްކުންވެސްވަނީ އެފަދަ ވިސްނުމެއް ގެންގުޅޭކަމަށް ބުނެފައެވެ.
ފެބްރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި ވައިގެމަގުން ޔޫކްރެއިނަށް ޙަމަލާދިނުމަށް ޢަމުރުކުރެއްވުމުގެ ކުރިން ރަޝިޔާގެ ރައީސް ވުލަޑުމީރް ޕުޓިންވަނީ ދޮންބާސްގެ ދެ ދަޢުލަތްކަމަށްވާ ދޮންޔެސްކާއި ލުހާންސްކުގެ މިނިވަންކަން ޤަބޫލުކުރައްވައި ޤަރާރެއްގައި ސޮއިކުރައްވައިފައެވެ. އެއާއެކު ޔޫކްރެއިނުގެ އެންމެ ގިނަ ޢަދަދެއްގެ މުސްލިމުން ދިރިއުޅޭ ދޮންބާސްގެ ދޮންޔެސްކާއި ލުހާންސްކުގެ ދަޢުލަތްތަކުންވަނީ ޔޫކްރެއިނުގެ އަސްކަރިއްޔާއިން ދެމުންދާ ޙަމަލާތަކުން ދިފާޢުވުމަށް ރަޝިޔާގެ އެހީތެރިކަމަށް އެދިފައެވެ. އދން ބުނެފައިވާ ގޮތުގައި ފާއިތުވި އަށް އަހަރުގެ ތެރޭގައި ޔޫކްރެއިނުގެ އަސްކަރިއްޔާއިން ދޮންބާސަށް ދިން ޙަމަލާތަކުގައި 13،000އަށްވުރެ ގިނަ މީހުންވަނީ މަރުވެފައެވެ.
ޔޫކްރެއިނަށް ދެމުންދާ ޙަމަލާތަކުގައި ރަޝިޔާއިން އެންމެ ބޮޑު އިސްކަމެއް ދީފައިވާ އަސްކަރީ ލަނޑުދަނޑިތަކުގެ ތެރޭގައި ދޮންބާސަށް ޙަމަލާދެމުންދާ ޔޫކްރެއިނުގެ ފައުޖުތައް ފަހަތަށްޖެއްސުން ހިމެނެއެވެ. އެ ގޮތުން ރަޝިޔާގެ ދިފާޢީ ވުޒާރާއިން ބުނެފައިވާ ގޮތުގައި ދޮންޔެސްކުގެ %54އާއި ލުހާންސްކުގެ %93 އޮތީ ދޮންބާސްގެ މިނިވަންކަމަށް ހަނގުރާމަކުރާ ޖަމާޢަތްތަކުގެ ބާރުގެ ދަށުގައެވެ. އަދި އެ ޖަމާޢަތްތަކަށް ބޭނުންވާ އަސްކަރީ އެހީތެރިކަމާއި އެއްބާރުލުން ރަޝިޔާއިން ފޯރުކޮށްދެމުންދާކަމަށްވެސް އެ ވުޒާރާއިން ބުނެފައިވެއެވެ.
ދޮންޔެސްކުގެ އެންމެ އިސްވެރިޔާ ދެނިސް ޕުޝިލިން ވިދާޅުވީ 2014ވަނަ އަހަރުން ފެށިގެން ދޮންބާސްގައި ދިރިއުޅޭ ރައްޔިތުން ބޭނުންވީ ރަޝިޔާއާ ގުޅެންކަމަށާއި އެ ސަރަޙައްދުގައި ދިރިއުޅޭ ރަޝިޔާ ނަޞްލުގެ އަދި ރަޝިޔާ ބަހުން ވާހަކަދައްކައި ރައްޔިތުންގެ އުއްމީދަކީ އެއީކަމަށެވެ. ނަމަވެސް އެފަދަ ނިންމުމެއްގެ ކުރިން ދޮންޔެސްކުގެ ސަރަޙައްދީ ރޮނގު ކަށަވަރުކުރަން ޖެހޭކަމަށާއި އެހެންނޫންނަމަ ފަހުން ކުރިމަތިވާނެ މައްސަލަތައް ބޮޑުވާނެކަމަށް އޭނާ ފާހަގަކުރެއްވިއެވެ. އޭނާ އެ މޭރުމުން ވާހަކަދައްކަވާފައިވަނީ ރަޝިޔާއާ ގުޅުމާ ގުޅޭގޮތުން ދޮންބާސް އަނެއް ދަޢުލަތްކަމަށްވާ ލުހާންސްކުގައި ފެންނަނުފެންނަ ވޯޓެއް ނެގުމަށް ހުށަހަޅާފައިވަނިކޮށެވެ. ލުހާންސްކުގައިވެސް ދިރިއުޅެނީ ރަޝިޔާ ނަޞްލުގެ އަދި ރަޝިޔާ ބަހުން ވާހަކަދައްކައި މީހުންނެވެ.
2014ވަނަ އަހަރުގެ ތެރޭގައި ޔޫކްރެއިނުގައި އުފެދުނު ސިޔާސީ ހަމަނުޖެހުންތަކާއި އިންޤިލާބުގެ ތެރޭގައި އެ ޤައުމުގެ ދެކުނުގައި އޮންނަ ކުރައިމިޔާގައި ފެންނަނުފެންނަ ވޯޓެއް ނެގުމަށްފަހުވަނީ ރަޝިޔާއިން ގުޅެން ނިންމައިފައެވެ. އެ ސަރަހައްދުގައިވެސް ދިރިއުޅެނީ ރަޝިޔާ ނަޞްލުގެ އަދި ރަޝިޔާ ބަހުން ވާހަކަދައްކައި މީހުންނެވެ.
ހަނގުރާމަ ހުއްޓާލައި ދާޢިމީ ޞުލްޙައެއް ޤާއިމުކުރުމަށް ރަޝިޔާއާއެކު ކުރަމުންދާ މަޝްވަރާތަކުގައި ޔޫކްރެއިނުން ބުނެފައިވަނީ އަމިއްލައަށް މިނިވަންކަން އިޢުލާންކޮށްފައިވާ ދޮންބާސްގެ ދެ ދަޢުލަތުގެ ކުރިމަގާމެދު ގޮތެއް ނިންމާނީ ރަޝިޔާގެ ރައީސް ވުލަޑުމީރް ޕުޓިންނާއި ޔޫކްރެއިނުގެ ރައީސް ވޮލޮދީމީރް ޒެލެންސްކީއާ ދެމެދު ބާއްވައި މަޝްވަރާތަކަށްފަހުކަމަށެވެ. އަދި 15 އަހަރުގެ މުއްދަތަކަށް ކުރިމިޔާ ސަރަޙައްދު ރަޝިޔާގެ ބެލުމުގެ ދަށުން ހިންގުމަށްވެސް ޔޫކްރެއިނުންވަނީ ހުށަހަޅައިފައެވެ.