ކުޑަކުދިންނަށް ކުރާ އަނިޔާގެ މައްސަލަތަކަކީ އަދުގެ މުޖުތަމައުތެރޭގައި އެންމެ ހޫނުކޮށް ދެކެވެމުން އަންނަ އެއް ވާހަކައެކެވެ. އެކުދިންނަށް ސްކޫލްގެ މާހައުލުންނާއި، އާއިލާގެ ތެރެއިން ނުވަތަ އާއިލާއިން ބޭރުންވެސް ތަފާތު އެކިއެކި އަނިޔާތައް ލިބެމުންދާއިރު ހިތާމައަކީ މިފަދަ މައްސަލަތަކަށް އެދެވޭ ހައްލެއް ނުލިބުމެވެ.
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ހާމަކޮށްފައިވާ ތަފާސްހިސާބުތަކުން ދައްކާގޮތުގައި ފާއިތުވީ ޖެނުއަރީ މަހާ އަޅާބަލާއިރު ފެބްރުއަރީމަހު ހުށަހަޅާފައިވާ މިފަދަ މައްސަލަތަކުގެ ޢަދަދުވަނީ އިތުރުވެފައެވެ. މިހިސާބުތައް ދައްކާގޮތުން ފެބްރުއަރީމަހު އެކަނިވެސް ކުޑަކުދިންނަށްކުރާ އަނިޔާގެ 106 މައްސަލައެއް ހުށަހަޅާފައިވެއެވެ.
ޖެންޑަރ މިނިސްޓްރީގެ ތަފާސްހިސާބުތައް ދައްކާގޮތުން މިދިޔަ ޖެނުއަރީ މަހު ކުޑަކުދިންނަށް ކުރި އެކި ބާވަތުގެ އަނިޔާގެ 105 މައްސަލައެއް އެ މިނިސްޓްރީއަށް ހުށަހަޅާފައިވެއެވެ. ފެބްރުއަރީ މަހު ޖެންޑަރ މިނިސްޓްރީއަށް ހުށަހަޅާފައިވަނީ މިބާވަތުގެ 106 މައްސަލައެވެ. ފެބްރުއަރީ މަހުގެ ތަފާސްހިސާބުތަކަށް ބަލާއިރު ކުޑަކުދިންނަށްކުރާ އަނިޔާގެ ތެރެއިން އެންމެ ގިނައިން ހުށައަޅާފައިވަނީ އިހުމާލުގެ މައްސަލަތަކެވެ. އެގޮތުން މިބާވަތުގެ 28 މައްސަލައެއް ވަނީ ހުށައަޅާފައެވެ.
މީގެ އިތުރުން ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 23 މައްސަލައަކާއި ޖިސްމާނީ ހާނިއްކައިގެ 16 މައްސަލައަކާއި ނަފްސާނީ ހާނިއްކައިގެ 6 މައްސަލައެއް ވަނީ ހުށަހަޅާފައެވެ. އަދި އެހެން ކުދިންގެ ފަރާތުން ފުރައްސާރައިގެ ޝިކާރައަކަށްވުމުގެ 5 މައްސަލައަކާއި ޖިންސީ ހާނިއްކައިގެ 23 މައްސަލައެއް ވަނީ ހުށަހަޅާފައެވެ. މީގެ އިތުރުން ނަހަމަ ގޮތުގައި ކުދިން ބޭނުންކުރުމުގެ 4 މައްސަލައެއްގެ އިތުރުން އެހެންކުދިންގެ ފަރާތުން އިންޓަރނެޓް މެދުވެރިކޮށް ގަނާ ލިބުމުގެ 1 މައްސަލައެއް ވަނީ އެ މިނިސްޓްރީއަށް ހުށަހަޅާފައެވެ.
ކުޑަކުދިންގެ މައްސަލަތަކުގެ ތެރޭގައި ކުދިންގެ އަޚުލާގާ ގުޅުންހުރި 14 މައްސަލައެއް މިދިޔަ މަހުވަނީ ޖެންޑަރ މިނިސްޓްރީއަށް ހުށަހަޅާފައެވެ. އޭގެ ތެރޭގައި ސްކޫލަށް ދާން ބޭނުންނުވުމުގެ 6 މައްސަލައާއި، ގެއިން ނުކުމެގެން ދިއުމުގެ 4 މައްސަލައެއްގެ އިތުރުން ރުޅި އިސްކުރުން ނުވަތަ ރުޅި ގަދަވެގެން އުޅުމުގެ 4 މައްސަލައެއް މިނިސްޓްރީއަށް ހުށަހަޅާފައިވެއެވެ. އަދި އަމިއްލަ ނަފްސަށް ގެއްލުންދިނުމާއި ގުޅޭ 10 މައްސަލައެއް މިދިޔަ މަހު މިނިސްޓްރީއަށް ވަނީ ހުށަހަޅާފައެވެ. މީގެ އިތުރުން ކުޑަކުދިންނަށް ލިބިގެންވާ ޙައްޤުތަކުން އެކުދިން މަޙްރޫމުކުރުމުގެ 1 މައްސަލައެއްވެސް ވަނީ ޖެންޑަރ މިނިސްޓްރީއަށް ހުށަހަޅާފައެވެ.
މިދިޔަ ފެބްރުއަރީ މަހުގެ ތެރޭގައި ޖެންޑަރ މިނިސްޓްރީއަށް ހުށަހަޅާފައިވާ 235 މައްސަލައިގެ ތެރޭގައި އާއިލީ މައްސަލައިގެ 26 މައްސަލައެއް ރިޕޯޓްކޮށްފައިވެއެވެ. އަދި ގެވެށި އަނިޔާގެ މައްސަލަތަކާއި އަމިއްލަ ނަފްސަށް ގެއްލުން ދިނުމުގެ މައްސަލައިގެ އިތުރުން ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން 16 މައްސަލައެއް ވަނީ އެ މިނިސްޓްރީއަށް ހުށަހަޅާފައެވެ.
ޖެންޑަރ މިނިސްޓްރީގެ ތަފާސްހިސާބުތައް ދައްކާ ގޮތުން މިދިޔަ މަހުގެ ނިޔަލަށް ދައުލަތުގެ ބެލުމުގެ ދަށުގައި ޖުމްލަ 193 ކުއްޖަކު އެބަތިބިއެވެ.
މި އަދަދުތަކަށް އެކަނި ބަލާލުމުންވެސް ކުޑަކުދިންނަށްކުރާ އަނިޔާ އިތުރުވެފައިވާ މިންވަރު ހާމަވެގެންދެއެވެ. މިއަދުގެ ކުޑަކުދިންނަކީ މާދަމާ މިޤައުމުގެ ހުންގާނުގައި ހިފައި މި ޤައުމު ކުރިއަރުވަން ތިބޭނެ މީހުންނެވެ. އެކުދިންގެ ހައްގުތައް ރައްކާތެރިކޮށް އެކުދިންގެ މުސްތަގުބަލް ކުރިއެރުވުމަށް މިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ.