ކޯވިޑާއި ގުޅިގެން ރާއްޖޭގައި އިއުލާންކުރި ސިއްހީ ކުއްލި ނުރައްކަލުގެ ހާލަތު އުވާލިފަހުން ފާއިތުވި 2 ހަފްތާގެ ތެރޭގައި ދެ ހާހަށްވުރެ ގިނަ މީހުން ކޯވިޑަށް ޕޮޒިޓިވްވެފައިވާކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ހާމަކުރައްވައިފިއެވެ.
ރާއްޖޭގައި އިއުލާންކުރި ސިއްހީ ކުއްލި ނުރައްކަލުގެ ހާލަތު އުވާލާފައިވަނީ މިމަހުގެ 13 ވަނަ ދުވަހުއެވެ. އަދި އޭގެފަހުން ރާއްޖޭގައި ކޯވިޑް ޖެހޭ މީހުންގެ ތަފާސް ހިސާބުތައް އާއްމުކުރުން މެދުކަނޑާލާފައި އޮތުމަށްފަހު އެޗްޕިއޭއިން ވަނީ މި މަހުގެ 14 ވަނަ ދުވަހުން ފެށިގެން 26 ވަނަ ދުވަހާއި ހަމައަށް ކޯވިޑް ޖެހުނު މީހުންގެ ތަފާސް ހިސާބުތައް މިއަދު އާއްމުކޮށްފައެވެ.
އެޗްޕީއޭގެ ތަފާސް ހިސާބުތައް ދައްކާގޮތުން މިމަހުގެ 14 ވަނަ ދުވަހުން ފެށިގެން މިމަހުގެ 26 ވަނަ ދުވަހުގެ ނިޔަލަށް ރާއްޖެއިން ކޯވިޑް ޖެހުނީ 2342 މީހުންނަށެވެ. އެއީ މާލެ ސަރަހައްދުން ޕޮޒިޓިވްވި 184 މީހުންނާއި އަތޮޅުތެރޭގެ ރަށްރަށުން ޕޮޒިޓިވްވި 1938 މީހުންނެވެ.
މިމަހުގެ 14 ވަނަ ދުވަހުން ފެށިގެން މިމަހުގެ 26 ވަނަ ދުވަހުގެ ނިޔަލަށް ކޯވިޑް ޖެހިގެން އެކަކު ވަނީ ނިޔާވެފައެވެ.
އެޗްޕީއޭއިން އާއްމުކުރި އެންމެފަހުގެ ތަފާސް ހިސާބުތަކާއެކު ރާއްޖެއިން ކޯވިޑް ޖެހުނު މީހުންގެ ޖުމްލަ އަދަދު ވަނީ 176993 އަށް އަރާފައެވެ. އަދި ކޯވިޑް ޖެހިގެން ރާއްޖެއިން މަރުވި މީހުންގެ އަދަދު ވަނީ 298 އަށް އަރާފައެވެ.
ކޯވިޑް-19އާ ގުޅިގެން ރާއްޖޭގައި އިޢުލާންކޮށްފައި އޮތް ޢާއްމު ސިއްޙަތުގެ ކުއްލި ނުރައްކަލުގެ ޙާލަތު ނިމުމަކަށް ގެނައުމާއި ގުޅިގެން އެޗް.ޕީ.އޭއިން ވަނީ ކޯވިޑުން ރައްކާތެރިވުމަށް އަޅާފައިވާ ބައެއް ފިޔަވަޅުތަކަށް ބަދަލު ގެންނަވާފައެވެ. އެގޮތުން ރާއްޖޭން ބޭރުން އަންނަ ހުރިހާ ފަރާތްތަކާއި ރާއްޖޭގެ އެތެރޭގައިވެސް އެއްވެސް ފަރާތަކަށް ދަތުރުކުރުމުގެ ބޭނުމުގައި ޕީ.ސީ.އާރ ޓެސްޓު ހަދަން ނުޖެހުން ހިމެނެއެވެ. އަދި މާސްކު އެޅުން މަޖުބޫރުކޮށްފައި އޮތްއޮތުންވެސް ވަނީ ނިމުމަކަށް ގެނެސްފައެވެ.