"ވިލުނު"ގެ ނަމުގައި އައްޑޫސިޓީ ހުޅުމީދޫގައި ދެކުނުގެ ސަރަހައްދީ ޑްރަގް ޓްރީޓްމެންޓް އެންޑް ރީހެބިލިޓޭޝަން ސެންޓަރ ހުޅުވައިފިއެވެ. މިތަން ހުޅުވައި ދެއްވީ ފޮރިން މިނިސްޓަރ އަބްދުﷲ ޝާހިދުއާއި ހެލްތު މިނިސްޓަރ އަހުމަދު ނަސީމް އާއި އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. ސުބްރަމަނިއަމް ޖައިޝަންކަރެވެ.
ހުޅުމީދޫގައި ޤާއިމުކޮށްފައިވާ މިސެންޓަރަކީ އެއްފަހަރާ 60 މީހުންނަށް ފަރުވާދެވޭ ގޮތަށް ތައްޔާރުކޮށްފައިވާ ސެންޓަރެކެވެ. މިއީ މާލެ އަތޮޅުން ބޭރުގައި މިފަދަ ފަރުވާ ދޭ އެންމެ ބޮޑު މަރުކަޒުކަމަށް ނޭޝަނަލް ޑްރަގް އެޖެންސީން ބުނެއެވެ. މިސެންޓަރުގައި އަންނަ ހަފްތާގައި 20 މީހަކަށް ފަރުވާ ދޭން ފަށާނެއެވެ. މިމަރުކަޒުގައި ފަރުވާދޭ ޕްރޮގްރާމަކީ ޑަބްލިއު އެޗްއޯގެ އެހީގައި ތައްޔާރުކޮށްްފައިވާ ޕްރޮގްރާމެކެވެ.
މިރަސްމީއްޔާތު ޝަރަފުވެރިކޮށްދެއްވާ ވާހަކަ ދައްކަވަމުން އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. ޖައިޝަންކަރު ވިދާޅުވީ، މިއީ އިންޑިއާގެ އެހީތެރިކަމާއެކު ރާއްޖޭގައި ހިންގަމުންދާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްތަކުގެ ތެރެއިން އެންމެ ފުރަތަމަ ނިމުނު މަޝްރޫޢު ކަމަށެވެ. އަދި ކުރިއަށް އިތުރު 7 މަޝްރޫޢެއް އިންޑިއާއިން ހަމަޖައްސާ ދެއްވާނެ ކަމަށް އެކްސްޓާނަލް އެފެއާޒް މިނިސްޓަރ ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން ފޮރިން މިނިސްޓަރ އަބްދުﷲ ޝާހިދު ވިދާޅުވީ ރާއްޖެއަށް މަސްތުވާ ތަކެތި ވަންނަ ދޮރުތައް ބަންދުކުރަން މި ސަރުކާރުން މަސައްކަތް ކުރަމުންދާ ކަމަށެވެ. އަދި މިކަން ހުއްޓުވަން ބަހަނާތައް ބަޔަކު ދައްކާ ކަމަށް އެމަނިކުފާނު ވިދާޅުވިއެވެ.
ހެލްތު މިނިސްޓަރ ނަސީމް ވިދާޅުވީ މިތަނުން ދޭ ޚިދުމަތަކީ ޒަމާނީ ފެންވަރުގެ ޚިދުމަތަކަށް ވާނެ ކަމަށާއި، މިއީ ބަންދުކޮށްގެން މައްސަލަ ހައްލުކުރާ ތަނަކަށް ވުރެން ބޮޑަށް އެތަނަށް ދާ މީހުންގެ އަޑު އަހައި މުޖްތަމަޢަށް އަނބުރާ ނެރުމަށް ކޮށްދެވޭނެ ހުރިހާ މަސައްކަތެއް ކޮށްދޭނެ ތަނަކަށްވާނެ ކަމަށެވެ. އަދި މައްސަލަ ފެށޭ ހިސާބު ދެނެގަނެ އެކަމަށް މަސައްކަތް ކުރެވޭތަނަކަށްވެސް މިތަން ވާނެ ކަމަށް މިނިސްޓަރ ވިދާޅުވިއެވެ.
އައްޑޫގައި މަސްތުވާތަކެތީގެ ވަބާގައި ޖެހިފައިވާ މީހުންނަށް ފަރުވާ ދިނުމަށް ހިތަދޫގައިވެސް މަރުކަޒެއް ޤާއިމު ކުރެވިފައިވެއެވެ. ނަމަވެސް އެތަނުގެ ޖާގައިގެ ދަތިކަމާއެކު އެތަނުގައި އިން ހައުސް ފަރުވާ ދެވެނީ އެންމެ 12 މީހުންނަށެވެ.
ކޮމިޝަނަރ އޮފް ޕޮލިސް މިދިޔަ އަހަރު އައްޑޫއަށް ކުރެއްވި ދަތުރުފުޅެއްގައި ވިދާޅުވި ގޮތުގައި އައްޑޫގައި މަސްތުވާތަކެތީގެ ވަބާގައި ޖެހިފައިވާ 1500 އަށް ވުރެ ގިނަ މީހުން ތިބި ކަމަށެވެ. އެހެން ކަމުން މިތަން ވެގެން ދާނީ އައްޑޫ އަދި މިސަރަހައްދުގައިވެސް ފަރުވާގެ ނިޒާމަށް ލިބިގެންދާނެ ބޮޑު ކުރިއެރުމަކަށެވެ.