ފުލުހުންގެ ޚިދުމަތް ތަރައްޤީކުރުމަށް ވޭތުވެދިޔަ 3 ސަރުކާރުގެ ޢަމާޒު ހުރީ އެއް މިސްރާބަކަށް: އިމްރާން

އައްޑޫގައި ޤާއިމުކުރި މޯލްޑިވްސް ޕޮލިސިންގް އެންޑް ލޯ އެންފޯސްމަންޓް އެކެޑަމީއަކީ ވޭތުވެދިޔަ 3 ސަރުކާރުގެވެސް އެއްބާރުލުމާއެކު ކުރިއަށްގެންދިޔަ މަސައްކަތެއްކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.

ޕޮލިސް އެކެޑަމީ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރ އިމްރާން އަބްދުﷲ ވިދާޅުވި މި މަސައްކަތުގައި ވޭތުވެދިޔަ 3 ސަރުކާރުގެ ޙިއްސާ އޮތުން ދޭހަވަނީ، ރާއްޖޭގެ ފުލުހުންގެ ޚިދުމަތް އިތުރަށް ކުރިއަރުވާ ފުޅާކުރުމަށް ކޮންމެ ސަރުކާރަކުންވެސް ބޭނުންވެފައިތިބި މިންވަރުކަމަށެވެ. އަދި މި މަސައްކަތުގައި ހުރިހާ ސަރުކާރަކުންވެސް މަސައްކަތް ކުރަމުންދިޔައީ އެއް ޢަމާޒަކަށްކަމަށް އިމްރާން ވިދާޅުވިއެވެ.

މިނިސްޓަރ ވިދާޅުވީ ޕޮލިސް އެކެޑަމީއާއެކު، ފުލުހުންގެ ޤާނޫނު ތަންފީޒްކުރުމަށް ބޭނުންވާ ފުރިހަމަ ތަމްރީން ލިބިތިބި ފުލުހުން ޚިދުމަތަށް ނެރުމަށް ބޮޑު އެހީއަކަށްވެގެންދާނެކަމަށެވެ. އަދި މި ދާއިރާއިން އަންނަމުންދާ ޒަމާނީ ބަދަލުތަކަށް ބޭނުންވާ ތަމްރީންތައް ދިނުމުގައި އަވަސްވެގެންދާނެކަންވެސް އިމްރާން ފާހަގަކުރެއްވިއެވެ.

"ހަމައެކަނި ދިވެހި ފުލުުންނަކަށް ނޫން މިކަމުގެ ފައިދާވަނީ. ކަމާގުޅުން ހުރި ހުރިހާ މުވައްސަސާތަކަށް، ދާއިރާތަކަށް ބޭނުންވާ ޢިލްމް ދިނުމުގައި މި ކޮލެޖް އެހީއަކަށްވާނެ. އަދި ދުނިޔޭގެ އެހެން ޤައުމުތަކާ ގުޅިގެން ޒަމާނީ ތަމްރީންދޭ މަރުކަޒަކަށް ވާނެ." އިމްރާން ވިދާޅުވިއެވެ.

އައްޑޫ ޕޮލިސް އެކެޑަމީއަކީ އިންޑީއާގެ ހިލޭ އެހީގައި އިމާރާތްކޮށް ހުޅުވާފައިވާ ފެސިލިޓީއެކެވެ.

ރަސްމިއްޔާތުގައި ވާހަކަދައްކަވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ މިއީ ފުލުހުންގެ ޚިދުމަތް ޒަމާނީކޮށް، ފުލުހުންގެ ސްޓްރެޓީޖިކް ޕްލޭނުގެ ޢަމާޒަށް ވާސިލިވުމަށް ހުޅުވުނު ދޮރެއްކަމަށެވެ. ޚާއްސަކޮށް ކުށުގެ ވެއްޓަށް އަންނަމުންދާ ބަދަލުތަކާއި އެއްގޮތަށް، ތަޙުޤީޤުތައް ބައްޓަންކުރުމަށް ބޭނުންވާ ތަމްރީންތައް އެ އެކެޑަމީގައި ކުރިއަށްގެންދާނެކަމަށް އިމްރާން ވިދާޅުވިއެވެ. އަދި މިހާރުވެސް ފުލުހުންގެ މަސައްކަތުގައި އެންމެ ގޮންޖެހުން ބޮޑު ދާއިރާއަކީ ތަޙުގީގީ ދާއިރާކަމަށްވެސް ކޮމިޝަނަރ އޮފް ޕޮލިސް ވިދާޅުވިއެވެ.

"މައްސަލަތައް ތަޙުޤީޤުކުރުމަކީ ފުލުހުންގެ އެންމެ ބޮޑު ޒިންމާ. އަދި އެންމެ ގޮންޖެހުން ބޮޑު އެއް މަސައްކަތް. ނަމަވެސް މިކަމަށް ބޭނުންވާ އެކަށީގެންވާ ތަމްރީނާއެކު، މައްސަލަތައް ތަޙުގީގުކުރުމުގައި ބޭނުންވާ މުހިންމު އުކުޅުތަކާއި، ބެސްޓް ޕްރެކްޓިސްތަކަށް ތަމްރީން ދެވިގެން ބޮޑު ކުރިއެރުމެއް ހޯދޭނެ ދާއިރާއެއް." ސީޕީ ޙަމީދު ވިދާޅުވިއެވެ.

ނޭޝަނަލް ޕޮލިސިންގް އެންޑް ލޯ އެންފޯސްމަންޓަކީ އެއްފަހަރާ 300 މީހުން ތަމްރީން ކުރެވޭ ފެސިލިޓީއެކެވެ. މި ފެސިލިޓީއަކީ އެއް ތަނެއްގައި ތިބެގެން، ކަމާގުޅޭ ހުރިހާ ތަމްރީންތައް ލިބޭގޮތަށް ފަރުމާކޮށް ތަރައްޤީކޮށްފައިވާ އެކެޑެމީއެކެވެ.

އެކެޑަމީ ހުޅުވުމަށް ބޭއްވި ރަސްމިއްޔާތުގައި، ގުޅުން ބަދަހިކުރުމާއި މީހުން ބިނާކުރުމުގެ ދާއިރާއިން ގުޅިގެން މަސައްކަތްކުރުމާ ބެހޭ އެއްބަސްވުމެއްގައި މޯލްޑިވްސް ޕޮލިސް ސަރވިސްއާއި އިންޑިއާގެ ސަރްދާރް ވައްލަބާއީ ޕަޓޭލް ނޭޝަނަލް ޕޮލިސް އެކަޑަމީއާ ދެމެދު ފަހުމުނާމާއެއްގައި ސޮއިކޮށްފައެވެ.