އެސްޓީއޯ ޕީޕަލްސް ޗޮއިސް ސުޕަމާޓުގައި، ބައިނަލްއަގްވާމީ މޭކަޕް ބްރޭންޑެއް ކަމަށްވާ ނޯޓް ކޮސްމެޓިކްސްގެ މޮނޯ އައުޓްލެޓެއް ހުޅުވައިފިއެވެ.
ނޯޓް ކޮސްމެޓިކްސްގެ މޮނޯ އައުޓްލެޓު ހުޅުވައިދެއްވީ އެކަމަށްޓަކައި ބޭއްވި ހާއްސަ ހަފްލާއެއްގައި އެސްޓީއޯގެ މެނޭޖިން ޑިރެކްޓަރު ހުސައިން އަމްރު މުޙައްމަދު ރަޝާދުގެ އިތުރުން އެ ކުންފުނީގެ ބޯޑު މެންބަރު އައިމިނަތު ރުޝްމާއެވެ.
މި ހަފްލާގައި ނޯޓް ކޮސްމެޓިކްސްއިން ވަނީ މޮނޯ އައުޓްލެޓްގެ ރަމްޒީ ތަޅުގަނޑި އެސްޓީއޯއާ ހަވާލުކޮށްފައެވެ. ނޯޓު ކޮސްމެޓިކްސްގެ ފަރާތުން ތަޅުދަނޑި ހަވާލުކޮށްދެއްވީ އެ ކުންފުނީގެ ރީޖަނަލް ޑިރެކްޓަރު ސުހާނެވެ. އެސްޓީއޯގެ ފަރާތުން ތަޅުދަނޑިއާ ހަވާލުވެވަޑައިގަތީ އަމްރުއެވެ.
ނޯޓް ކޮސްމެޓިކްސް ހާމަކުރާގޮތުގައި އެ ބްރޭންޑުގެ އުފެއްދުންތައް ތައްޔާރުކުރަނީ، ގޮތްނޭގޭ ކެމިކަލްތަކުން އެއްކިބާވެ ޙަލާލު ސެޓްފިކެޓްގެ ދަށުން ފައިދާހުރި ޤުދުރަތީ މާއްދާތަށް ބޭނުންކޮށްގެންނެވެ. ނޯޓް ކޮސްމެޓިކްސް އަކީ ޔޫރަޕްގެ އުފެއްދުމެކެވެ.
އެސްޓީއޯއިން ވަނީ އެކުންފުނީގެ ސުޕަމާކެޓް "އެސްޓީއޯ ޕީޕަލްސް ޗޮއިސް" ގިނަ ބަދަލުތަކެއް ގެނެސްފައެވެ. އެގޮތުން އެސްޓީއޯގެ ފިހާރައިން އެހެން ވިޔަފާރިވެރިންނަށް ފުރުސަތު ދީފައިވާއިރު މިއީ ޢާއްމުނަށް ލިބޭ އިތުރު ލުޔެއްކަމަށް އެސްޓީއޯއިން ވިދާޅުވެއެވެ. މިގޮތުން އެސްޓީއޯގެ ތެރޭގައި ނިއު އެޑިޝަން، ސިޓީ އިންވެސްޓްމަންޓް، މަޑިހާ ކޮމްޕެނީ، އަސްރަފީ ބުކްޝޮޕް، ޕޮއިސް، މެކްސްކޮމް، މެރަތަން މޯލްޑިވްސް އަދި ޕީކަބޫއިން ލިބޭ އެކި މުދަލާއި ޚިދުމަތް އެސްޓީއޯ ޕީޕަލްސް ޗޮއިސްއިން ލިބޭނެ އިންތިޒާމުވަނީ ހަމަޖައްސާފައެވެ.