ޗައިނާއާއެކު އޮންނަ ގުޅުންތައް ބަދަހިކުރެވޭނީ މިލްކުވެރިކަމާމެދި ޚިޔާލުތަފާތުވެފައިވާ ސަރަޙައްދުތަކުން އެ ޤައުމުގެ ސިފައިން ފަހަތަށް ޖެއްސުމުންކަމަށް އިންޑިޔާއިން ބުނެފިއެވެ.
އިންޑިޔާގެ ވެރިރަށް ނިޔު ދިއްލީގައި ޗައިނާގެ ޚާރިޖީ ވަޒީރު ވާންގް ޔީއާއެކު ބޭއްވެވި ތިންގަޑިއިރުގެ ބައްދަލުވުމަކަށްފަހު ނޫސްވެރިންނަށް މަޢުލޫމާތުދެއްވަމުން އިންޑިޔާގެ ޚާރިޖީ ވަޒީރު ސުބުރަމާންޔަމު ޖައިޝަންކަރު ވިދާޅުވީ އިންޑިޔާގެ ކަންބޮޑުވުންތައް ވަރަށް ސާފުކޮށް ވާންގް ޔީ އަރިހުގައި ވިދާޅުވިންކަމަށާއި 2020ވަނަ އަހަރުގެ އޭޕުރިލް މަހުގެ ތެރޭގައި ސަރަޙައްދީ ރޮނގު ހުރަސްކޮށް އިންޑިޔާގެ ސަރަޙައްދުތަކަށް ޗައިނާގެ ސިފައިން ވަނުމުން ދެ ޤައުމުގެ ދެމެދުގައި ނުތަނަވަސްކަން އުފެދުނުކަމަށެވެ.
އިންޑިޔާއިން ޗައިނާއަށް ކަނޑައަޅާފައިވާ ސަފީރުކަން މީގެ ކުރިން ކުރައްވާފައިވާ ޖައިޝަންކަރު ވިދާޅުވީ ޔޫކްރެއިނުގެ މައްސަލައާ ގުޅޭގޮތުންވެސް ވާންގް ޔީއާ މަޝްވަރާކުރެއްވިކަމަށާއި ޔޫކްރެއިނުގައި ކުރަމުންދާ ހަނގުރާމަ ހުއްޓާލަންޖެހޭކަމަށް އިންޑިޔާއާއި ޗައިނާއިން އެއްބަސްވާކަމަށެވެ. ހުޅަނގުން ބާރުއެޅި ނަމަވެސް ރަޝިޔާއިން ޔޫކްރެއިނަށް ދެމުންދާ ޙަމަލާތައް ކުށްވެރިކުރުމަށް އެ ދެ ޤައުމުންވަނީ ފަސްޖެހިފައެވެ.
ކުއްލި ދަތުރުފުޅެއްގައި ވާންގް ޔީ އިންޑިޔާއަށް ވަޑައިގެންނެވީ ޕާކިސްތާނާއި އަފްޣާނިސްތާނަށް ވަޑައިގެންނެވުމަށްފަހުއެވެ. އެ ގޮތުން ޕާކިސްތާނަށް ކުރެއްވި ދަތުރުފުޅުގައި ކަޝްމީރުގެ މައްސަލާގައި އެ ޤައުމާ އެއްކޮޅަށް ވާންގް ޔީ ވާހަކަދެއްކެވުމުން އިންޑިޔާއިންވަނީ ހިތްހަމަނުޖެހުން ފާޅުކޮށްފައެވެ. އިންޑިޔާއަށްފަހު އޭނާ ވަޑައިގަންނަވާނީ ނޭޕާލަށެވެ.