އެމެރިކާގެ ފުރަތަމަ އަންހެން ޚާރިޖީ ވަޒީރު މެޑަލިން އޯލްބުރައިޓު އަވަހާރަވެއްޖެއެވެ.
ދެވަނަ ބޮޑު ހަނގުރާމައިގެ ދުވަސްވަރު ނާޒީ ޖަރުމަންވިލާތުން ޗެކަސުލޮވޭކިޔާއަށް ދިން ޙަމަލާތަކުން ސަލާމަތްވެވަޑައިގެން އެމެރިކާއަށް ހިޖުރަކޮށް އެ ޤައުމުގެ ފުރަތަމަ އަންހެން ޚާރިޖީ ވަޒީރަށްވެވަޑައިގެންނެވުމަށްފަހު އަންހެނުންގެ ޙައްޤުތަކަށް ވަކާލާތުކުރެއްވުމުގައި މުޙިއްމު ދަޢުރެއް ޢަދާކުރެއްވި މެޑަލިން އޯލްބުރައިޓު އަވަހާރަވެފައިވަނީ ޢުމުރުފުޅުން 84 އަހަރުގައެވެ. އޭނާ އަވަހާރަވެފައިވަނީ ކެންސަރުގެ އާލާސްކަންފުޅަށް ފަރުވާ ހޯއްދަވަނިކޮށެވެ.
އެމެރިކާގެ ކުރީގެ ރައީސް ބިލް ކުލިންޓަނުގެ ދަޢުރުގައި 1993ވަނަ އަހަރުން 1997ވަނަ އަހަރަށް އެމެރިކާއިން އދއަށް ކަނޑައަޅާފައިވާ ސަފީރުކަން މެޑަލިން އޯލްބުރައިޓު ފުރުއްވިއެވެ. އެއަށްފަހު 1997ވަނަ އަހަރުން 2001ވަނަ އަހަރަށް އޭނާވަނީ އެމެރިކާގެ ޚާރިޖީ ވަޒީރުކަން ކުރައްވައިފައެވެ. އޭނާ ފާހަގަވެފައިވަނީ ޚާރިޖީ ދާޢިރާގެ ވަރުގަދަ ޝަހްސިއްޔަތެއްގެ ގޮތުގައެވެ. ޚާއްޞަކޮށް ރުވާންޑާއާއި ބޮސްނިޔާއާއި ކޮސޯވާގައި ހިންގި ޤަތުލުޢާއްމުތައް ދުނިޔޭގެ ސަމާލުކަމަށް ގެނައުމަށް އޭނާވަނީ މުޙިއްމު ދަޢުރެއް ޢަދާކުރައްވައިފައެވެ.