ވެއްޓުނު ޗައިނާ އީސްޓަންގެ މަތިންދާބޯޓުގެ ކަޅުފޮށި ހޯދައިފިއެވެ.
އެމެރިކާގެ ބޮއިން ކުންފުނީގެ 800-737 މަރުކައިގެ މަތިންދާބޯޓު ވެއްޓުނީ ޗައިނާގެ ކުންމިންގުން ދަތުރުކުރަނިކޮށް އެ ޤައުމުގެ ވޫޒުހޯ ސިޓީ ކައިރިއަށެވެ. ފަރުބަދަމަތީ ސަރަޙައްދަކަށް މަތިންދާބޯޓު ވެއްޓުމާއެކު އޭގައި ވަރަށް ބޮޑަށް އަލިފާން ރޯވިއެވެ. 132 މީހުންނާއެކު ދަތުރުކުރި މަތިންދާބޯޓު ވެއްޓުނު ސަބަބެއް އަދި ނޭނގެއެވެ. އަދި އެ ޚާދިޘާގައި ސަލާމަތްވި މީހުންގެ ޢަދަދެއްވެސް ނޭނގެއެވެ.
ސިވިލް އޭވިއޭޝަން އެޑުމިނިސްޓުރޭޝަން އޮފް ޗައިނާ، ސީއޭއޭސީން ބުނެފައިވާ ގޮތުގައި މަތިންދާބޯޓުގެ ކަޅުފޮށި އޮތީ ވަރަށް ބޮޑަށް ހަލާކުވެފައިވާކަމަށާއި އޭގެ އެތެރޭގެ ބައިތަކަށްވެސް ގެއްލުންވެފައިވާކަމަށެވެ. ނަމަވެސް އޭގެ ރެކޯޑަރުން ބޭނުންވާ މަޢުލޫމާތުތައް ލިބޭނެކަމުގެ އުއްމީދު ބޮޑުކަމަށާއި ދެވަނަ ކަޅުފޮށި ހޯދުމުގެ މަސައްކަތްކުރަމުންދާކަމަށްވެސް އެ ވުޒާރާއިން ބުނެފައިވެއެވެ. އެ މަތިންދާބޯޓު ވެއްޓުނީ މޫސުން ގޯސްވުމުގެ ސަބަބުންކަމަށް ނުބެލެވޭކަމަށާއި އެއަރ ކޮންޓުރޯލުން ޕައިލެޓުންނާ ވާހަކަދައްކަމުންދިޔަކަމަށްވެސް އެ ވުޒާރާއިން ބުނެފައިވެއެވެ. އަދި މަތިންދާބޯޓު ވެއްޓުނީ ކުއްލިއަކަށް މަދު ސިކުންތުކޮޅެއްގެ ތެރޭގައިކަމަށްވެސް އެ ވުޒާރާއިންވަނީ ބުނެފައެވެ.
ޗައިނާގެ ސަރުކާރުން ހިންގައި އެންމެ ބޮޑު ތިން އެއަރލައިނުގެ ތެރޭގައި ޗައިނާ އީސްޓަން ހިމެނެއެވެ. ބައިނަލްއަޤްވާމީ ދަތުރުތައް ހިމެނޭހެން 248 މަންޒިލަކަށް ޗައިނާ އީސްޓަންނުން ދަތުރުކުރެއެވެ. އަދި ދުނިޔޭގެ އެންމެ ސަލާމަތީ ކަންކަން ރަނގަޅު އެއަރލައިނުތަކުގެ ތެރޭގައި ޗައިނާ އީސްޓަން ހިމެނެއެވެ.