ދުނިޔޭގެ އެންމެ ބޮޑު 20 އިޤްތިޞާދުގެ މައްޗަށް އެކުލެވޭ ޖީ20ގެ ބައްދަލުވުމެއްގައި ބައިވެރިވެވަޑައިގެންނެވުމަށް ރަޝިޔާގެ ރައީސް ވުލަޑުމީރް ޕުޓިން ނިންމަވައިފިއެވެ. އެއީ ރަޝިޔާގެ ފައުޖުތަކުން ޔޫކްރެއިނަށް ޙަމަލާދޭން ފެށިފަހުން ބައިނަލްއަޤްވާމީ ބައްދަލުވުމެއްގައި ބައިވެރިވެވަޑައިގަތުމަށް ޕުޓިން ނިންމެވި ފުރަތަމަ ފަހަރެވެ.
މީގެ އެއް މަސްދުވަސް ކުރިން ޔޫކްރެއިނަށް ޙަމަލާދިނުމަށް ނިންމެވުމުން އެމެރިކާއާއި ހުޅަނގުގެ ބާރުތަކުންވަނީ އިންޑޮނޭޝިޔާގައި ބޭއްވުމަށް ހަމަޖެހިފައިވާ ޖީ20ގެ ބައްދަލުވުމުގައި ބައިވެރިވެވަޑައިގަތުމުގެ ފުރުޞަތު ޕުޓިންނަށް ދިނުމާ ގުޅޭގޮތުން މަޝްވަރާކޮށްފައެވެ. ނަމަވެސް އެ ބައްދަލުވުމުގައި ޕުޓިންނަށް ބައިވެރިވެވަޑައިނުގެންނެވޭނެކަމަށް އެމެރިކާއާއި ހުޅަނގުގެ ބާރުތަކުން ނިންމި ނަމަވެސް އެ ނިންމުމަށް އެހެން ޤައުމުތަކުން ތާޢީދުކުރާނެކަމަކަށް ނުބެލެއެވެ. އެ މައްސަލާގައި އިންޑޮނޭޝީޔާއިން ވަކި އެއްޗެއް ބުނެފައެއް ނުވެއެވެ. ގިނަ ޤައުމުތަކުގެ ވިސްނުމަކީ ޖީ20ގެ ބައްދަލުވުމަކީ އިޤްތިޞާދީ ބައްދަލުވުމެއްކަމަށާއި ޔޫކްރެއިނުގެ މައްސަލާގައި ބާއްވައި ބައްދަލުވުމެއް ނޫންކަމުން އެ ބައްދަލުވުމުގައި ޕުޓިންނަށް ބައިވެރިވެވަޑައިގެންނެވޭނެކަމަށް ކަނޑައެޅުމެވެ.
ޖީ20ގެ ބައްދަލުވުން ބޭއްވުމަށް ހަމަޖެހިފައިވަނީ އަންނަ ނޮވެންބަރު މަހުގެ ތެރޭގައި އިންޑޮނޭޝިޔާގެ ރިސޯޓު ރަށެއްކަމަށްވާ ބާލީގައެވެ.