ޔޫއޭފާ ކޮންފެރެންސް ލީގުގެ ކުއާޓާފައިނަލުގައި ހޯސޭ މޮރީނިޔޯގެ ރޯމާއަށް އަނެއްކާވެސް ބޯޑޮ ގުލިންމްތާ ކުޅެން ޖެހިއްޖެއެވެ.
ޔޫއޭފާ ކޮންފެރެންސް ލީގުގެ ގުރޫޕު ސުޓޭޖުގައި ބޯޑޮއިންވަނީ އަމިއްލަ ދަނޑުގައި ކުޅެ 6-1ން ރޯމާ ބަލިކޮށްފައެވެ. އަދި އޭގެ ދުވަސްކޮޅެއްފަހުން ރޯމާގެ އަމިއްލަ ދަނޑުގައި ނޯވޭގެ ކުޑަކުޑަ ޓީމެއްކަމަށްވާ ބޯޑޮވަނީ 2-2ން އެއްވަރުކޮށްފައެވެ. އެއީ ކޮންފެރެންސް ލީގުގެ އެންމެ ހައިރާން ކުރުވި ނަތިޖާއެވެ. ކޮންފެރެންސް ލީގުގައި ވާދަކުރާ އިނގިރޭސިވިލާތުގެ ލެސްޓާއަށް ކުޅެން ޖެހިފައިވަނީ ނިޞްބަތުން އުނދަގޫ ޓީމެއްކަމަށްވާ ނެދަލެންޑްސްގެ ޕީއެސްވީއާ ދެކޮޅަށެވެ. މުބާރާތުގައި ވާދަކުރާ ނެދަލެންޑްސްގެ ދެވަނަ ޓީމުކަމަށްވާ ފޭނޫޑު ނުކުންނާނީ ސުލާވިޔާ ޕުރާގާ ދެކޮޅަށެވެ. އަދި ފަރަންސޭސިވިލާތުގެ މާސޭއަށް ލައްވާލީ ގުރީސްގެ ޕީއޭއޯކޭއެވެ.
ޔޫއޭފާ ކޮންފެރެންސް ލީގުގެ ސެމީފައިނަލުގައި ކުޅެން ހަމަޖެހިފައިވަނީ ލެސްޓާއާއި ޕީއެސްވީގެ ތެރެއިން ކުރި ހޯދާ ޓީމާއި މާސޭއާއި ޕީއޭއޯކޭގެ ތެރެއިން ކުރި ހޯދާ ޓީމެވެ. އަދި ސެމީފައިނަލުގެ އަނެއް މެޗުގައި ކުޅޭނީ ރޯމާއާއި ބޯޑޮގެ ތެރެއިން ކުރި ހޯދާ ޓީމާއި ފޭނޫޑާއި ޕުރާގާގެ ތެރެއިން ކުރި ހޯދާ ޓީމެވެ.
ޗެންޕިއަންސް ލީގުގެ ކުއާޓާފައިނަލުގެ މެޗުތައް ކުޅެން ފެށުމަށް ހަމަޖެހިފައިވަނީ އޭޕުރީލް މަހުގެ 7ވަނަ ދުވަހުއެވެ. އަދި ސެމީފައިނަލުގެ މެޗުތައް ފެށުމަށް ހަމަޖެހިފައިވަނީ އޭޕުރީލް މަހުގެ 28ވަނަ ދުވަހުއެވެ. މުބާރާތުގެ ފައިނަލް ކުޅުމަށް ހަމަޖެހިފައިވަނީ މޭއި މަހުގެ 25ވަނަ ދުވަހު އަލްބޭނިޔާގެ ވެރިރަށް ތިރާނާގައެވެ.