ޔޫއޭފާ ޔޫރޮޕާ ލީގުގެ ކުއާޓާފައިނަލުގައި މުބާރާތް ކާމިޔާބުކުރާނެކަމަށް އެންމެ ބޮޑަށް ބެލެވޭ ބާސަލޯނާއާއި ޖަރުމަންވިލާތުގެ ފުރެންކްފަރޓާ ކުޅެން ޖެހިއްޖެއެވެ.
ޔޫރޮޕާ ލީގުގައި ދެން ވާދަކުރާ ޖަރުމަންވިލާތުގެ އަނެއް ޓީމުކަމަށްވާ ލިޕުޒީގަށް ކުރިމަތިލާންޖެހެނީ ނިޞްބަތުން ވަރުގަދަ ޓީމެއްކަމަށްވާ އިޓަލީވިލާތުގެ އެޓަލާންޓާއާ ދެކޮޅަށްށެވެ. ލިޕުޒިގާއި އެޓަލާންޓާވަނީ މި ސީސަނުގައި ޗެންޕިއަންސް ލީގުގައިވެސް ކުޅެފައެވެ. ޔޫރޮޕާ ލީގުގައި ވާދަކުރާ އިނގިރޭސިވިލާތަށް ނިޞްބަތްވާ ހަމައެކަނި ޓީމުކަމަށްވާ ވެސްޓު ހޭމަށް ލައްވާލީ ލިޔޯނެވެ. ޔޫރޮޕާ ލީގުގެ ކުއާޓާފައިނަލުގައި ދެން ވާދަކުރަނީ ބުރާގާއާއި ރޭންޖާސްސެވެ.
ޔޫރޮޕާ ލީގުގެ ސެމީފައިނަލުގައި ވާދަކުރާނީ ލިޕުޒިގާއި އެޓަލާންޓާގެ ތެރެއިން ކުރި ހޯދާ ޓީމާއި ބާސާއާއި ފުރެންކްފަރޓުގެ ތެރެއިން ކުރި ހޯދާ ޓީމެވެ. އަދި ސެމީފައިނަލުގެ ދެވަނަ މެޗުގައި ވާދަކުރާނީ ވެސްޓު ހޭމާއި ލިޔޯނުގެ ތެރެއިން ކުރި ހޯދާ ޓީމާއި ބުރާގާއާއި ރޭންޖާސްގެ ތެރެއިން ކުރި ހޯދާ ޓީމެވެ.
ޔޫރޮޕާ ލީގުގެ ކުއާޓާފައިނަލުގެ މެޗުތައް ކުޅެން ފެށުމަށް ހަމަޖެހިފައިވަނީ އޭޕުރީލް މަހުގެ 7ވަނަ ދުވަހުއެވެ. އަދި ސެމީފައިނަލުގެ މެޗުތައް ފެށުމަށް ހަމަޖެހިފައިވަނީ އޭޕުރީލް މަހުގެ 28ވަނަ ދުވަހުއެވެ. މުބާރާތުގެ ފައިނަލް ކުޅުމަށް ހަމަޖެހިފައިވަނީ މޭއި މަހުގެ 18ވަނަ ދުވަހު ސުޕެއިންގެ ސެވިލްގައެވެ.