އެމްޑީޕީގެ އެތެރޭގެ އިންތިޚާބުގައި 94000 އަށްވުރެ ގިނަ މީހުންނަށް ވޯޓުލުމުގެ ހައްގު ލިބިފައިވާކަމަށް އެޕާޓީން ބުނެފިއެވެ.
އެމްޑީޕީގެ އެންމެ އިސް މަޤާމުތައްކަމަށްވާ ޗެއަރޕާސަންއާއި، އަންހެނުންގެ ރޫހުގެ ރައީސްއާއި ޒުވާނުންގެ ހިތްވަރުގެ ގޮފީގެ ރައީސް ހޮވުމަށް ބާއްވާ އިންތިޚާބުގައި ވޯޓުލުމުގެ ހައްގު 94214 މީހުންނަށް ލިބިގެންވާކަމަށް އެޕާޓިން ބުންޏެވެ.
އެމްޑީޕީން ވަނީ މި އިންތިޚާބުގައި ވޯޓުލެވޭނެ މީހުންގެ ލިސްޓް މިހާރު އާންމުކޮށްފައެވެ.
އެމްޑީޕީން ވޯޓުލުމުގެ ހައްގު ދޭނީ، މި އިންތިޚާބަށް ކުރިމަތިލުމުގެ މުއްދަތު ހަމަވި ތާރީޚާއި ހަމައަށް އެޕާޓީގައި ތިބި މެންބަރުންނަށްކަމަށް އެމްޑީޕީން ބުންޏެވެ.
އެމްޑީޕީގެ ދަފްތަރުގައި ތިބި 94 ހާހަށްވުރެ ގިނަ މީހުންނަށް ވޯޓު ލެވޭނެކަމަށް އެޕާޓިން ބުނެފައިވާއިރު، އިލެކްޝަންސް ކޮމިޝަނުން ޢާންމުކޮށްފައިވާ އެމްޑީޕީގެ ދަފްތަރުގައި ތިބީ 54782 މީހުންނެވެ.
އެމްޑީޕީގެ ޗެއަރޕާސަން ހޮވުމަށް ބާއްވާ އިންތިޚާބު އޮންނާނީ މެއި 14ގައެވެ. ކުރިން މި އިންތިޚާބު ބާއްވަން ނިންމާފައިއޮތީ އަންނަ އޭޕްރީލް މަހުގެ 16ގައެވެ.
އެމްޑީޕީގެ ޗެއަރޕާސަން އިންތިޚާބުގައި ދެ ކެނޑިޑޭޓަކު ވާދަކުރެއެވެ. އެއީ އިކޮނޮމިކް މިނިސްޓަރ ފައްޔާޟް އިސްމާޢީލާއި، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއެވެ. އަދި އަންހެނުންގެ ރޫހުގެ ރައީސްކަމަށް ވާދަކުރައްވަނީ އައްޑޫ މީދޫ ދާއިރާގެ މެންބަރު ރޮޒައިނާ އާދަމާއި، އަންހެނުންގެ ރޫހުގެ މިހާރުގެ މެންބަރު ސަފާތު އަޙްމަދެވެ.
ވާދަވެރިކަން ބޮޑު އެމްޑީޕީގެ އެތެރޭގެ އިންތިޚާބުގެ ކެމްޕެއިން ކެނޑިޑޭޓުން ގެންދަނީ ފޯރީގައި ކުރައްވަމުންނެވެ.