400 އަށްވުރެ ގިނަ ބައިވެރިންނާއެކު މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ކުރިއަށްގެންދިޔަ އިމަންޖެންސީ އެކްސަސައިޒް ނިންމާލައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ކުރިއަށްގެންދިޔަ އެމްޖެންސީ ޑްރިލް 4 ގަޑިއިރަށް ދެމިގެންދިޔައެވެ. މިއީ އެއަރޕޯޓްގެ ކުއްލި ޙާލަތާ ގުޅޭގޮތުން މިހާތަނަށް ރާއްޖޭގައި ބޭއްވި އެންމެ ބޮޑު އެކްސަސައިޒެވެ.
އެމްއޭސީއެލްއާއި ޑިޒާސްޓަރ މެނޭޖްމަންޓް އޮތޯރިޓީ ގުޅިގެން ކުރިއަށްގެންދިޔަ އެކްސަސައިޒްގައި ކަމާއި ގުޅުންހުރި 30 އިދާރާއިން ބައިވެރިވެފައިވެއެވެ. އެއީ އެކި އިދާރާތަކުގެ 400އަށްވުރެ ގިނަ މީހުންނެވެ.
މި ޑްރިލް ކޮންމެ ދެ އަހަރަކުން އެމްއޭސީއެލްއިން ބާއްވަމުން އައިނަމަވެސް، މިފަހަރުގެ ޑްރިލަކީ މިގޮތަށް ރާއްޖޭގައިވެސް ބޭއްވި އެންމެ ބޮޑު ޑްރިލްއެވެ.
އެމްއޭސީއެލްއިން ވިދާޅުވީ މިފަހަރުގެ ޑްރިލް ޚާއްސަކޮށްފައިވަނީ، އަލަށް ތަރައްޤީކުރި ރަންވޭ މަތީގައި ފްލައިޓެއް ކްރޭޝްވުން ނުވަތަ ފްލައިޓަކަށް ދިމާވާ ކުއްލި ޙާލަތެއްގައި ކަމާގުޅުންހުރި ދާއިރާތައް ގުޅިގެން މަސައްކަތް ކުރާނެ ގޮތާއި ގުޅޭގޮތުންކަމަށެވެ. އެގޮތުން އެއަރޕޯޓް ކުއްލި ޙާލަތަށް ގެނައުމާއި، ކުއްލި ޙާލަތާއި ގުޅިގެން އެއަރޕޯޓްގެ އޮޕަރޭޝަނަށް ގެންނަ ބަދަލުތައް އެކްސަސައިޒް ކޮށްފައިވާކަމަށެވެ.
އެމްއޭސީއެލްއިން ވިދާޅުވީ އެއަރޕޯޓް ފުލްސްކޭލް އެމަރޖެންސީ އެކްސަސައިޒްގައި ކުއްލި ނުރައްކަލުގެ ޚާލަތުގައި ވެލާނާ އިންޓަރނޭޝަނަލް އެއަރޕޯޓްގެ އެމަރޖެންސީ ޕްލޭން އަދި ސްޓޭންޑަރޑް އޮޕަރޭޓިންގ ޕްރޮސީޖަރސްކާއި، މިޙަރަކާތުގައި ބައިވެރިވާ އެއަރލައިންގެ ކުއްލި ޚާލަތުގެ ޕްލޭން ޓެސްޓްކޮށްފައިވާކަމަށެވެ. މިފަހަރުގެ ފުލްސްކޭލް އެމަރޖެންސީ އެކްސަސައިޒްގެ ރަސްމީ އެއަރލައިންގެ ގޮތުގައި ބައިވެރިވެފައިވަނީ އެމިރޭޓްސް އެއަރލައިނުންނެވެ. އަދި އެމް.އޭ.ސީ.އެލްގެ ޑިޕާޓްމަންޓްތަކާއި، ސަރުކާރުގެ އެކިއިދާރާތަކާއި، ކަމާއިގުޅޭ އެހެން މުއައްސަސާތަކުގެ މެދުގައި ކޯޑިނޭޝަން އޮންނަ މިންވަރުވެސް ވަޒަން ކޮށްފައިވާކަމަށެވެ. މީގެ އިތުރުން ކުއްލި ނުރައްކަލުގެ ޚާލަތެއްގައި އެހީތެރިވާނެ އިދާރާތަކާއި ޞިއްހީ ޙިދުމަތްދޭ ތަންތަނުގެ ކެޝުއަލްޓީ މެނޭޖްމެންޓް ކެޕޭސިޓީ އަމިއްލައަށް ވަޒަންކުރުމުގެ ފުރުޞަތުވެސް މިި ޑްރިލްގެ ސަބަބުން ލިބުނުކަމަށެވެ. އަދި އެމް.އޭ.ސީ.އެލްގެ މީޑިއާ މެނޭޖްމެންޓާއި ފަޔަރ އެންޑް ރެސްކިއު ސަރވިސަސްގެ ޙަރަކާތްތައް މިފަދަ ޚާލަތަކަށް ތައްޔާރުވެފައިވާ މިންވަރު ވަޒަންކޮށްފައިވެއެވެ.
މި އެކްސަސައިޒާއި ގުޅިގެން ހަވީރު 4 އިން 6 އަކަށް އެއަޕޯޓުގެ ރަންވޭގެ އޮޕަރޭޝަން އެއްކޮށް މަޑުޖައްސާލާފައިވެއެވެ. ނަމަވެސް ބައިނަލް އަޤްވާމީ އުދުހުންތަކުގެ ޗެކްއިން އަދި ސީޕްލޭން އޮޕަރޭޝަން ހުއްޓުމެއްނެތި ކުރިއަށް ގެންގޮސްފައިވެއެވެ.