އަންހެނުން ބާރުވެރިކުރުވުމަށާއި، އަންހެނުންނަށް ތަޢުލީމީ ފުރުޞަތުތައް ފަހިކޮށްދިނުމަށްޓަކައި ފިނެކް އިންސްޓިޓިއުޓް ފޯރ ޑިވެލޮޕްމަންޓް ސްޓަޑީސްއާއި ބްރިޖިންގ ދަ ކޮމިއުނިޓީސް މޯލްޑިވްސް (ބީ.ސީ.އެމް)އާ ދެމެދު ފަހުމުނާމާއެއްގައި ސޮއިކޮށްފިއެވެ.
2 އަހަރު ދުވަހުގެ މުއްދަތަށް ސޮއިކުރެވުނު މި ފަހުމުނާމާގައި ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސްގެ ފަރާތުން ސޮއިކުރެއްވީ އެކަޑަމިކް ކައުންސިލްގެ ވައިސް ޗެއަރމަން ފާޠިމަތު މުނާއެވެ. ބީސީއެމްގެ ފަރާތުން ސޮއިކުރެއްވީ ސެކްރެޓަރީ ޖެނެރަލް ފާޠިމަތު ނައުޝާންއެވެ.
މި ފަހުމުނާމާގެ ދަށުން ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސްގެ ފަރާތުން ހިންގާ ކޮންމެ ކޯހެއްގައި ބީސީއެމްގެ ފަރާތުން ބައިވެރިކުރާ 1 އަންހެން ބޭފުޅަކަށް ހިލޭ ކިޔެވުމުގެ ފުރުޞަތު ލިބިގެންދާނެއެވެ. މި ފަހުމުނާމާގެ ދަށުން ބީސީއެމްގެ ފަރާތުން އަންހެނުން ބާރުވެރިކުރުވުމަށް ހިންގާ ހަރަކާތްތަކަށް ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސް އިން ފަންނީ ލަފާއާއި އެހީތެރިކަން ދިނުމަށްވަނީ ހަމަޖެހިފައެވެ.
އަދި މި ފަހުމުނާމާގެ ދަށުން ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސްގެ ފަރާތުން އަލަށް ތަޢާރުފުކުރުމަށް ނިންމާފައިވާ "ސްޓްރެޓެޖިކް ޖެންޑަރ ޑެވަލޮޕްމަންޓް" ކޯހުގެ މުޤައްރަރު އެކުލަވައިލުމުގައްޔާއި އިޖުތިމާޢީ އެހެނިހެން ކޯސްތައް ފަރުމާކުރުމުގައި ބީސީއެމްގެ ފަރާތުން ފަންނީ އެހީތެރިކަން ދިނުމަށްވެސް ވަނީ ހަމަޖެހިފައިވެއެވެ.
މިއަހަރުގެ ޖަނަވަރީ މަހުގެ 14 ވަނަ ދުވަހު އުފެދުނު ބީސީއެމްގެ އެންމެ ބޮޑު މަގްސަދަކީ އަންހެނުންގެ ޙައްޤުތައް ހޯދައިދިނުމަށާއި އަންހެނުން ބާރުވެރިކުރުވުމެވެ. އެ ގޮތުން ޓެކްނޮލޮޖީއަށާއި ޤާނޫނީ ދާއިރާއަށާއި މީޑިއާގެ ދާއިރާއަށް އަންހެނުން އަހުލުވެރިކުރުވުމަށް ޕްރޮގްރާމްތައް ހިންގުމުގެ އިތުރުން ސެލްފް ޑިފެންސް ކްލާސްތައް ބީސީއެމްއިން ހންގުމަށްވަނީ ހަމަޖެހިފައެވެ. ބީސީއެމްއިން މިހާރުވެސް އަންނަނީ ފުޅާ ދާއިރާއެއްގައި މިފަދަ ހަރަކާތްތައް ހިންގަމުންނެވެ.