އިންގްލިޝް ޕްރިމިއާ ލީގުގައި ކްރިސްޓަލް ޕެލެސްއާ މެންޗެސްޓާ ސިޓީއަށް ލަނޑެއް ނުޖެހި އެއްވަރުވެއްޖެއެވެ. މެޗުން އެއްވަރުވުމުން އެއްވަނަގައި އޮތް ލިޑުގެ ފަރަގު ބޮޑުކުރުމަށް ލިބުނު ފުރުޞަތު ވަނީ ގެއްލިފައެވެ.
ކްރިސްޓަލް ޕެލެސްގެ ދަނޑުގައި ކުޅުނު މެޗުގައި ގޮނައިރު ބޯޅަ ގެންގުޅެ ގިނަ ޙަމަލާ އުފައްދާފައިވަނީ ސިޓީންނެވެ. ސިޓީގެ ފިލް ފޯޑެން އާއި ރިޔާދު މަހުރޭޒް އަދި ކެވިން ޑިބްރޭނާ ޖެހި ބޯޅަތައް ޕެލެސްގެ ކީޕަރު ވިސެންޓޭ ގައީޓާ ވަނީ މަތަކޮށްފައެވެ. އެންމެ ރަނގަޅު ފުރުސަތަކަށް ދެ ވަނަ ހާފުގައި ޑި ބްރޭނާ ނެގި ހިލޭ ޖެހުން ލަޕޯޓް ބޮލުން ޖަހަން އެރި ނަމަވެސް އެންމެ ރަނގަޅަށް ފޮނުވާނުލެވި، ކީޕަރު ގައީޓާ ވަނީ ބޯޅަ ނަގައިފައެވެ.
މި މެޗުގައި ޕެލެސް އިން ވެސް ގޯލެއް ޖެހޭތޯ ފުރުސަތު ތަނަވަސްކުރިއެވެ. އެގޮތުން ވިލްފްރިއެޑް ޒަހާ އާއި ކޮނާ ގެލަގާ އަދި އޮޑްސަން އެޑޮއާޑް ޖެހި ބޯޅަތައް ދިޔައީ ގޯލާ ސީދާނުވެ އެވެ. ރޭގެ މެޗު އެއްވަރުވިއިރު، ސިޓީ އަށް މި ފަހަރު ލީގުގައި ޕެލެސް ކޮޅަށް ދެ މެޗުން ލަނޑެއް ނުޖެހުނެވެ. ސިޓީ ދަނޑުގައި ޕެލެސް ވަނީ 2-0 އިން މޮޅުވެފަ އެވެ.
ސިޓީގެ ކޯޗު ޕެޕް ގާޑިއޯލާ ބުނީ ލަނޑެއް ޖެހުން ނޫން ހުރިހާ ކަމެއް ދިޔައީ ރަނގަޅަށް ކަމަށާއި ފުޓްބޯޅައިގައި ބައެއް ދުވަސްތަކަކީ ގޯލެއް ކާމިޔާބު ކުރުމުގެ ނަސީބު ނުލިބޭ ދުވަސްތައް ކަމަށެވެ.
ޕެލެސްގެ ކޯޗު ޕެޓްރިކް ވިއޭރާ ބުނީ މެޗުގައި ބޭނުންވި ގޮތަށް ހުރިހާ ކަމެއް ދިޔަނަމަ މިއީ ޕެލެސް އަށް މޮޅުވެވޭނެ މެޗެއް ކަމަށާއި ނަމަވެސް، އެއްވަރުވެގެން މި ލިބުނު ޕޮއިންޓު ވެސް ވަރަށް މުހިންމު ކަމަށެވެ.
ރޭގެ މެޗުން މޮޅުވެ، ސިޓީ އަށް އަލުން ލީގުގެ ކުރީގައި ހަ ޕޮއިންޓަށް ލީޑުނަގަން ލިބުނު ފުރުސަތު ގެއްލި، މި ވަގުތު އޮތީ ހަތަރު ޕޮއިންޓުގެ ލީޑަކާ އެކުގައެވެ. އެއީ 29 މެޗުން ލިބިފައިވާ 70 ޕޮއިންޓާއެކުގަވެ. ދެ ވަނައިގައި އޮތް ލިވަޕޫލަށް 28 މެޗުން 66 ޕޮއިންޓް ލިބިފައިވާއިރު، ބުދަ ދުވަހުގެރޭ އާސެނަލް އަތުން ލިވަޕޫލް މޮޅުވެއްޖެނަމަ ސިޓީއާ އެއް ޕޮއިންޓް ކައިރިއަށް ޖެހިލާނެއެވެ.