މިއަހަރުގެ ފުރަތަމަ ކުއާޓަރުގައި ބީއެމްއެލް ކޮމިއުނިޓީ ފަންޑުގެ އެހީ ލިބޭ ޕްރޮޖެކްޓްތައް ހާމަކޮށްފިއެވެ.
ބޭންކް އޮފް މޯލްޑިވްސްއިން ހިންގާ ކޮމިއުނިޓީ ފަންޑުގެ ދަށުން މިއަހަރުގެ ފުރުތަމަ ކުއާޓަރގައި ހުށަހެޅުނު ޕްރޮޕޯސަލްތަކުގެ ތެރެއިން ހޮވާފައިވަނީ އެންމެ ރަނގަޅު 5 ޕްރޮޖެކްޓްތަކެވެ. މިގޮތުން ހޮވުނު ފަސް ޕްރޮޖެކްޓަކީ މާއުނގޫދޫގައި ސޯލާ މަގުބައްތި ހަރުކުރުމާއި، ލަންދޫގައި ބާބަކިއު ސަރަހައްދެއް ގާއިމްކުރުމާއި، ކިނބިދޫގައި ޕިކްނިކް ސަރަހައްދެއް ގާއިމްކުރުން އަދި ބިލެތްފަހީގައި ލައިބްރަރީ ތަރައްގީކުރުމުގެ އިތުރުން ކާށިދޫގައި ބާބަކިއު ސަރަހައްދެއް ގާއިމްކުރުމެވެ.
ބީއެމްއެލްއިން ހިންގާ ކޮމިއުނިޓީ ފަންޑަކީ އަމިއްލަ ފަރުދުންނާއި ހިލޭ ސާބަހަށް މަސައްކަތްކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް މާލީ އެހީތެރިކަން ފޯރުކޮށްދިނުމަށް ހުޅުވާލެވިފައިވާ ފަންޑެކެވެ.
މި ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކަށާއި، ތަޢުލީމާއި، ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ. މިފަންޑުގެ ދަށުން މިހާތަނަށް މިވަނީ މުޖުތަމައަށް ފައިދާކުރާ 56 ޕްރޮޖެކްޓެއް ހިންގުމަށް އެހީތެރިކަން ފޯރުކޮށްދީފައެވެ.