ފްރެންޗް ލީގުގައި ބޯޑޯ އަތުން 3-0 އިން ޕީއެސްޖީ މޮޅުވުމުން އެ ޓީމުގެ ގިނަ ކުޅުންތެރިންނާ ދެކޮޅަށް ސަޕޯޓަރުން ޝުއޫރުފާޅުކޮށްފިއެވެ.
ބޯޑޯ އަތުން ޕީއެސްޖީ މޮޅުވި މެޗުގައި ގޯލުތައް ޖެހީ ކީލިއަން އެމްބާޕޭ އާއި ނޭމާ އަދި ލެއަންޑްރޯ ޕަރޭޑޭސްއެވެ. މި މެޗުގައި ޕީއެސްޖީގެ ކުޅުންތެރިން ކަމަށްވާ ނޭމާ އާއި ލިއޮނަލް މެސީ ފައިގައި ބޯޅަ ޖެހުމާއެކު ސަޕޯޓަރުން ވަނީ ނުރުހުން ފާޅުކުރުމުގެ ގޮތުން އަޑުގަދަކޮށްފައެވެ.
މެޗުގެ ކުރިން ޕީއެސްޖީގެ އެކި ސަޕޯޓަރުންގެ ގުރޫޕް ތަމްސީލްކުރާ ސީޔޫޕީ އިން ސޯޝަލް މީޑިއާގައި ވަނީ މެނޭޖްމަންޓުން އިސްތިއުފާ ދޭންޖެހޭކަމަށް ބުނެފައެވެ.
ޕީއެސްޖީން މިހާތަނަށް ހޯދި ނުވަ ލީގު ޗެމްޕިއަންޝިޕްގެ ތެރެއިން ހަތް ޗެމްޕިއަންޝިޕް ހޯދީ ގަތަރު ސްޕޯޓްސް އިންވެސްޓްމަންޓް ގުރޫޕުން އެ ކްލަބާ ހަވާލުވި ފަހުންނެވެ. އެކަމަކު ޗެމްޕިއަންސް ލީގު ހޯދުމަށް އެ ކްލަބުން ދެކެމުންދާ ހުވަފެންތައް އަދި ހަގީގަތަކަށް ނުވެއެވެ.
ގަތަރަށް ނިސްބަތްވާ އަލް ހަލީފާ އަކީ ޕީއެސްޖީގެ ރައީސްގެ އިތުރުން، ބެއިން މީޑިއާ ގުރޫޕާއި ގަތަރު ސްޕޯޓްސް އިންވެސްޓްމަންޓްގެ ޗެއާމަނެވެ. "ކްލަބުގެ މެނޭޖްމަންޓް އެންމެ މަތީ ފަންތިން ފެށިގެން، ބަދަލެއް އެބަ ބޭނުންވޭ،" ސީޔޫޕީން ބުނެފައިވެއެވެ.
މި ސީޒަންގެ ޗެމްޕިއަންސް ލީގުގެ ގަދަ 16އިން ޕީއެސްޖީ ކެޓީ މިދިޔަ ހަފުތާ ކުޅުނު ދެވަނަ ލެގުގައި ރެއާލް މެޑްރިޑް އަތުން 3-1 އިން ރަށުން ބޭރުގައި ބަލިވުމުންނެވެ.
އެ މެޗުގެ ރެފްރީގެ ބައެއް ނިންމުންތަކާ ހިތްހަމަނުޖެހިގެން، ހަލީފާ ވަނީ މެޗަށް ފަހު ރެފްރީންގެ ރޫމަށް ވަންނަން މަސައްކަތްކޮށް، އެސިސްޓަންޓް ރެފްރީގެ ބައެއް ސާމާނުތަކަށް ގެއްލުން ދީފައެވެ.