މީގެ ދެ ހަފުތާއެއްހައި ދުވަސް ކުރިން ސިންގަޕޫރުގައި ކުރެއްވި ތައިރޮއިޑްގެ އޮޕަރޭޝަނަށްފަހު މިހާރު ޙާލުކޮޅު މުޅިން ރަނގަޅުކަން ހާމަކުރައްވައި އެމަނިކުފާނަށް ހެޔޮ ދުޢާކޮށްދިން އެނެމެންނަށް ރައީސުލްޖުމްހޫރިއްޔާ ޝުކުރު އަދާކުރައްވައިފިއެވެ.
ޤައުމާ މުޚާޠަބުކުރައްވައި ދެއްވި ވީޑިއޯ މެސެޖުގައި ރައީސް ވިދާޅުވީ މީގެ ހަފުތާއެއްހާ ދުވަސް ކުރިން ކުރެއްވި ތައިރޮއިޑްގެ އޮޕަރޭޝަނަށްފަހު މާތް ﷲގެ އޯގާވަންތަކަމުން އެމަނިކުފާނުގެ ހާލުކޮޅު މިހާރު ރަނގަޅުކަމަށެވެ. އަދި އޮޕަރޭޝަނަށް ސިންގަޕޫރަށް ވަޑައިގަތް ދުވަހުން ފެށިގެން، އެމަނިކުފާނަށް ހެޔޮ ދުޢާކޮށްދެއްވި އެންމެހައި ބޭފުޅުންނަށް ވަރަށް އިހުލާސްތެރިކަމާއެކު އެމަނިކުފާނާ ޢާއިލާގެ ފަރާތްޕުޅުން ޝުކުރު އަދާކުރައްވާކަމަށެވެ.
މިއީ މި އޮޕަރޭޝަނަށްފަހު އެމަނިކުފާނު ޢާއްމުރައްޔިތުންނާ މުޚާޠަބުކުރައްވައި ވާހަކަފުޅުދެއްކެވި ފުރަތަމަ ފަހަރެވެ.
ތައިރޮއިޑްގެ އޮޕަރޭޝަނެއް ކުރައްވަން ރައީސުލްޖުމްހޫރިްޔާ ސިންގަޕޫރަށް ވަޑައިގަތީ މިދިޔަ މަހުގެ 23ވަނަ ދުވަހުއެވެ. 25ވަނަ ދުވަހު ކުރެއްވި 3 ގަޑިއިރުގެ އޮޕަރޭޝަނަށްފަހު އެ މަނިކުފާނު ހޮސްޕިޓަލުގައި ހަތަރު ދުވަސް ހޭދަކުރެއްވިއެވެ. އެމަނިކުފާނު އޮޕަރޭޝަން ކުރެއްވިވަގުތު ރައީސުލްޖުމްހޫރިއްޔާކަމުގެ މަސްއޫލިއްޔަތުތަކާއި ވާޖިބުތައް ވަނީ އެމަނިކުފާނުގެ ނާއިބު ފައިސަލް ނަސީމާ ހަވާލުކުރައްވައި އެކަން ޢިއުލާން ކުރައްވާފައެވެ. އޮޕަރޭޝަނަށްފަހު އަނެއްކާވެސް އަލުން މަޤާމުގެ މަސްއޫލިއްޔަތުތަކާ ޙަވާލުވެވަޑައިގެން އެކަން ހާމަކުރެއްވިއެވެ.
މި އޮޕަރޭޝަނަށްފަހު ރައީސުލްޖުމްހޫރިއްޔާ އެނބުރި ރާއްޖެ ވަޑައިގަތީ މިމަހުގެ 6ވަނަ ދުވަހުއެވެ.