ޢިރާޤުގެ އުތުރުގައި އޮންނަ ކުރުދީންގެ މައިރަށެއްކަމަށް އިރްބީލަށް ދިން ޙަމަލާތައް ޢަމާޒުކޮށްފައިވަނީ އިސްރާއީލުގެ އަސްކަރީ ވަޞީލަތްތަކަށްކަމަށް އީރާނުގެ އިންޤިލާބީ ފައުޖުން ބުނެފިއެވެ،
އީރާނުން އިރްބީލަށް ވަރުގަދަ ބެލިސްޓިކް މިސައިލް ޙަމަލާއެއް ދީފައިވަނީ އީރާނުގެ ނިޔުކްލިޔަރ އެއްބަސްވުން އިޔާދަކުރުމަށް ފާއިތުވި 11 މަސްދުވަހުގެ ތެރޭގައި ކުރަމުންދިޔަ މަޝްވަރާތައް ނިމުމަކާ ގާތަށް ގޮސްފައިވަނިކޮށް ހުއްޓިފައިވާ ދަނޑިވަޅެއްގައެވެ. އީރާނުގެ މިސައިލް ޙަމަލާތައް ޢަމާޒުކޮށްފައިވަނީ އެމެރިކާގެ ކޮންސިޔުލޭޓުގެ އައު އިމާރާތަށްކަމަށާއި އެ ޙަމަލާތަކުގައި އެކަކު ޒަޚަމުވިކަމަށް ޢިރާޤުގެ ސަރުކާރުންވަނީ ބުނެފައެވެ. އެ ސަރަޙައްދުގައި ޙަރަކާތްތެރިވާ އެމެރިކާ ސިފައިންނާ ދެކޮޅަށް އީރާނާ ގުޅުން އޮންނަ ހަނގުރާމަވެރި ޖަމާޢަތްތަކުން މީގެ ކުރިންވެސްވަނީ ގިނަ ޢަދަދެއްގެ ޙަމަލާތަކެއް ދީފައެވެ.
އެއީ އެމެރިކާގެ ބާރުގެ ދަށުގައި އޮންނަ ސަރަޙައްދަށް 2020ވަނަ އަހަރުގެ ޖަނަވަރީ މަހުގެ ފަހުން އީރާނުން ޙަމަލާއެއް ދިން ފުރަތަމަ ފަހަރެވެ. އެ ގޮތުން އީރާނުން އެންމެ ފަހުން އެމެރިކާއާ ދެކޮޅަށް ޙަމަލާއެއް ދިނީ އީރާނުގެ އިންޤިލާބީ ފައުޖުގެ އިސްވެރިއެއްކަމަށްވާ ޤާސިމު ސުލައިމާނީ އަވާހަރަކޮށްލަން ދިން ޙަމަލާގެ ބަދަލުހިފުމަށެވެ.
އީރާނުގެ އިންޤިލާބީ ފައުޖުން ނެރުނު ބަޔާނެއްގައި ބުނެފައިވަނީ އެ ޙަމަލާތަކުގެ ބަދަލުގައި އިސްރާއީލުން އެއްވެސް ފިޔަވަޅެއް އަޅައިފިނަމަ އީރާނުގެ ވަރުގަދަ އަދި ގެއްލުން ބޮޑު ރައްދަކާ ޔަހޫދީން ކުރިމަތިލާން ޖެހޭނެކަމަށެވެ. ބެލެވޭ ގޮތުގައި އީރާނުން އިރްބީލަށް ޙަމަލާދިނީ ޔަހޫދީ ފައުޖުތަކުން ސޫރިޔާއަށް ދިން ވައިގެ ޙަމަލާއެއްގައި އިންޤިލާބީ ފައުޖުގެ ދެ މެންބަރުން މަރުވުމުންނެވެ.