އިންޑިއާއިން އޮޅުމަކުން ޕާކިސްތާނަށް މިސައިލެއް އުދުއްސާލެވުނުކަމަށް ބުނެފިއެވެ. އިންޑިއާއިން ބުނީ ޕާކިސްތާނަށް މިސައިލެއް އުދުއްސާލެވުނީ އާއްމުކޮށް ކުރާ މެއިންޓެނެންސް މަރުހަލާގައި ޓެކްނިކަލް މައްސަލައެއް ދިމާވެގެން ކަމަށެވެ.
އަސްކަރީ ތަޖުރިބާކާރުން ވަނީ މީގެ ކުރިންވެސް ނިއުކްލިޔަރ ހަތިޔާރުގެ ޤާބިލުކަން ލިބިފައިވާ އަވަށްޓެރި ޤައުމުތަކުން އެކްސިޑެންޓްތައް ނުވަތަ ހިސާބުތައް ނުބައިވެ، މިފަދަ މައްސަލައެއް ދިމާވެދާނެ ކަމުގެ އިންޒާރު ދީފައެވެ.
ފާއިތުވެދިޔަ މަސްތަކުގައި ނުތަނަވަސްކަން އެ ސަރަޙައްދުގައި ވަނީ ވަރަށް ބޮޑަށް ކުޑަވެފައެވެ. އަދި މިއީ އެންމެ ފުރަތަމަ ދިމާވި ހާދިސާކަމަށް ވުމުން ސަރަޙައްދުގެ ރައްކާތެރިކަމުގެ އުސޫލުތަކާމެދު ވަނީ ސުވާލު އުފެދިފައެވެ.
ތިން ޕެރެގްރާފްގެ މައްޗަށް އެކުލެވޭ އިންޑިއާގެ ދިފާއީ ވުޒާރާގެ ބަޔާނުގައި ބުނެފައިވަނީ މާރިޗު 2022ގައި ރޫޓީން މެއިންޓެނަންސްގެ ތެރޭގައި ޓެކްނިކަލް މައްސަލައެއް ދިމާވެ، ކުއްލި ގޮތަކަށް މިސައިލެއް އުދުއްސާލެވިފައިވާ ކަމަށެވެ. އަދި އެނގިފައިވާ ގޮތުގައި މިސައިލް ވެއްޓުނީ ޕާކިސްތާނުގެ ސަރަހައްދަށް ކަމަށާއި މިއީ ވަރަށް ހިތާމަވެރިކޮށް ދިމާވި ހާދިސާއެއް ކަމަށެވެ. މި އެކްސިޑެންޓުގެ ސަބަބުން އެއްވެސް މީހެއްގެ ފުރާނައަށް ގެއްލުން ވެފައި ނުވުމަކީވެސް ލިބޭ ހިތްހަމަ ޖެހުމެއްކަމަށް އިންޑިއާގެ ބަޔާނުގައި ވެއެވެ. އެ މިނިސްޓްރީން ބުނީ ސަރުކާރުން މިއީ ސީރިއަސް މައްސަލައެއްގެ ގޮތުގައި ކަނޑައަޅާ މަތީ ފެންވަރުގެ ކޯޓަކުން އެކަން ބެލުމަށް ވަނީ އަންގާފައެވެ.
ޕާކިސްތާނުގެ އޮފިޝަލުން ވިދާޅުވީ މިސައިލް ވެއްޓުނީ ވެރިރަށް އިސްލާމްއާބާދާއި ގާތްގަނޑަކަށް 500 ކިލޯމީޓަރު ދުރުގައި އޮންނަ އެ ޤައުމުގެ އިރުމަތީ ސިޓީއެއް ކައިރިއަށް ކަމަށެވެ.
މިފަދަ އިހުމާލުތަކުން ނުކުމެދާނެ ނޭދެވޭ ނަތީޖާތަކަށް ސަމާލުވެ، މުސްތަގުބަލުގައި މިފަދަ އަމަލުތައް ތަކުރާރުވިޔަ ނުދިނުމަށް ހަރުދަނާ ފިޔަވަޅުތަކެއް އެޅުމަށް ޕާކިސްތާނުން ވަނީ އިންޑިއާއަށް ގޮވާލާފައެވެ.