ޔޫކްރެއިނަށް ދެމުންދާ ވަރުގަދަ ޙަމަލާތައް ފުޅާކޮށް އިތުރު ސަރަޙައްދުތަކަށް ރަޝިޔާގެ ފައުޖުތަކުން ޙަމަލާދީފިއެވެ.
ރަޝިޔާގެ ދިފާޢީ ވުޒާރާއިން ބުނެފައިވަނީ ޔޫކްރެއިނުގެ ހުޅަނގުގައި އޮންނަ ލުސްކާއި އިވަނޯ ފުރެންކިންސްކުގެ އަސްކަރީ މަޤާމުތަކަށް ވަރުގަދަ ޙަމަލާތަކެއް ދީފައިވާކަމަށެވެ. އެ ގޮތުން އެ ދެ ރަށަށް ދިން ޙަމަލާތަކުގައި އެ ސަރަޙައްދުގައި އޮންނަ އަސްކަރީ ވައިގެ މަރުކަޒުތައް ނައްތާލެވިފައިވާކަމަށްވެސް އެ ވުޒާރާއިން ބުނެފައިވެއެވެ.
ފެބްރުއަރީ މަހުގެ 24ވަނަ ދުވަހުން ފެށިގެން ވައިގެމަގުންނާއި ކަނޑުމަގުންނާއި އެއްގަމުން ރަޝިޔާއިން ދެމުންދާ ވަރުގަދަ ޙަމަލާތައް ބޮޑަށް ޢަމާޒުކޮށްފައިވަނީ ޔޫކްރެއިނުގެ އިރުމަތީގައި އޮންނަ ކަރްކީކުގެ ސަރަޙައްދަށާއި ދެކުނުގައި އޮންނަ ކުރިމިޔާގެ ސަރަޙައްދަށާއި އުތުރުގައި އޮންނަ ވެރިރަށް ކިޔޭވުގެ ސަރަޙައްދަށެވެ. ޔޫކްރެއިނަށް ޙަމަލާދެމުންދާ ރަޝިޔާގެ ބާރުގަދަ ލަޝްކަރުތައް ކުރިޔަށްޖެހެމުންދަނީ އެ ތިން ސަރަޙައްދުންނެވެ. މީގެ ކުރިން ޔޫކްރެއިނުގެ ހުޅަނގުގެ ސަރަޙައްދުތަކަށް ވަރުގަދަ ޙަމަލާތަކެއް ރަޝިޔާއިން ދީފައެއް ނުވެއެވެ. އޭގެ އިތުރުން ޔޫކްރެއިނުގެ މެދުތެރޭގައި އޮންނަ މުޙިއްމު ރަށެއްކަމަށްވާ ދިނިޕުރޯއަށްވެސް ފުރަތަމަ ފަހަރަށް ރަޝިޔާގެ ފައުޖުތަކުންވަނީ ޙަމަލާދީފައެވެ. އެއާއެކު ކުރިޔަށް އޮތް ދުވަސްތަކުގައި ޙަމަލާތައް އިތުރަށް ފުޅާވާނެކަމަށްވަނީ ބެލެވިފައެވެ.
ރަޝިޔާގެ ދިފާޢީ ވުޒާރާއިން ބުނެފައިވާ ގޮތުގައި ފާއިތުވި 24 ގަޑިއިރުގެ ތެރޭގައި ޔޫކްރެއިނުގެ އަސްކަރީ 107 މަޤާމެއް ނައްތާލައި އަސްކަރީ 8 ޑުރޯނާއި 3 ހެލިކޮޕުޓަރުވަނީ ވައްޓާލާފައެވެ. އެއާއެކު ފާއިތުވި 16 ދުވަހުގެ ތެރޭގައި ރަޝިޔާގެ ފައުޖުތަކުންވަނީ ޔޫކްރެއިނުގެ އަސްކަރީ 3,213 މަޤާމެއް ނައްތާލާފައެވެ. އަދި ޔޫކްރެއިނުގެ އިރުމަތިން ބޮޑެތި ކުރިއެރުންތަކެއް ހޯދައި އެ ސަރަޙައްދުގެ އަވަށްތަކުން ޔޫކްރެއިނުގެ ސިފައިން ފައްސާލާފައިވާކަމަށްވެސް އެ ވުޒާރާއިން ބުނެފައިވެއެވެ.
ޔޫކްރެއިނުގެ ކުރަމުންދާ ހަނގުރާމަ ތިންވަނަ ހަފުތާއަކަށް ދިގުލައިގެން ގޮސްފައިވާ ދަނޑިވަޅެއްގައި 16،000އަށްވުރެ ގިނަ ހަނގުރާމަވެރިންވަނީ ރަޝިޔާގެ ފައުޖުތަކާ ގުޅިގެން ހަނގުރާމަކުރުމަށް އެދިފައެވެ. އޭގެ ތެރޭގައި ގިނައީ މެދުއިރުމަތީގައި އައިއެސް ޖަމާޢަތާއި އަލްޤައިދާ ޖަމާޢަތާ ދެކޮޅަށް ހަނގުރާމަކޮށްފައިވާ ތަޖުރިބާކާރު ހަނގުރާމަވެރިންނެވެ. އެހެންކަމުން އެ ހަނގުރާމަވެރިންނަށް އެ ފުރުޞަތު ދިނުމަށް ރަޝިޔާގެ ސަރުކާރުންވަނީ ނިންމައިފައެވެ. ރަޝިޔާގެ ސަރުކާރާ ޞުލްޙަ ޤާއިމުކޮށްފައިވާ ޗެޗުނިޔާގެ އެތައް ހާސް ހަނގުރާމަވެރިންވެސްވަނީ ރަޝިޔާގެ ފައުޖުތަކާ ގުޅިގެން ހަނގުރާމަކުރުމަށް ޔޫކްރެއިނަށް ގޮސްފައެވެ. ޔޫކްރެއިނުންވަނީ ރަޝިޔާއާ ދެކޮޅަށް ހަނގުރާމަކުރުމަށް 20،000އަށްވުރެ ކުލީ ސިފައިން އެ ޤައުމަށް ވިސާއަކާ ނުލައި އައުމުގެ ޙުއްދަދީފައެވެ. އަދި ހުޅަނގުގެ ބައެއް ކުންފުނިތަކުންވަނީ ޔޫކްރެއިނަށް ދާން ބޭނުންވާ ކުލީ ސިފައިންނަށް މަހަކު 60،000 އެމެރިކާ ޑޮލަރުގެ މުސާރައެއް ހުށަހަޅައިފައެވެ.