ވިލާތުގެ ކައުންސިލުން ރަޝިޔާ ވަކިވެއްޖެއެވެ.
ފެބްރުއަރީ މަހުގެ 24ވަނަ ދުވަހު ޔޫކްރެއިނަށް ވަރުގަދަ ޙަމަލާތަކެއް ދޭން ފެށުމުން ވިލާތުގެ ކައުންސިލުން ރަޝިޔާވަނީ ސަސްޕެންޑުކޮށްފައެވެ. އޭރު ނިންމާފައިވަނީ އެ ކައުންސިލާއި ވިލާތުގެ ޤާނޫނުހަދާ މަޖިލީހުގެ ބައްދަލުވުންތަކުގައި ރަޝިޔާއަށް ބައިވެރިނުވެވޭނެކަމަށެވެ. ނަމަވެސް ރަޝިޔާއަކީ އަދިވެސް ވިލާތުގެ ކައުންސިލުގެ މެންބަރު ޤައުމެއްކަމަށާއި އެހެންކަމުން އެ ކައުންސިލުގެ ޤާނޫނުތަކާއި މުޢާހަދާތަކާއި އެއްބަސްވުންތަކަށް ޢަމަލުކުރަން ޖެހޭނެކަމަށް ބުނެފައިވެއެވެ.
ރަޝިޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ އެމެރިކާގެ ބޭނުންތަކާއި މަޤްޞަދުތައް ޙާޞިލްކުރުމަށް އުފައްދާފައިވާ ޖަމުޢިއްޔާއެއްގެ މެންބަރުކަން ބޭނުންނުވާކަމަށާއި ދުޝްމަނު ޤައުމުތަކަށް ލިބިފައިވާ އާރާއި ބާރުތަކުގެ ނާޖައިޒު ފައިދާތައް ނަގަމުންދާކަމަށެވެ. ވިލާތުގެ ކައުންސިލުން ސަސްޕެންޑުކުރި ނަމަވެސް އިންސާނީ ޙައްޤުތަކާބެހޭ ވިލާތުގެ ކޯޓަށް ރަޝިޔާއިން ބޭނުންވާ މައްސަލަތައް ހުށަހެޅޭނެކަމަށާއި ރަޝިޔާއާ ކުރަން ޖެހޭ ހުރިހާ މުޢާމަލާތެއް ކުރަމުންދާނެކަމަށްވެސް އެ ކައުންސިލުން ބުނެފައިވެއެވެ. ނަމަވެސް ވިލާތުގެ ކައުންސިލުން ވަކިވުމަށްފަހު ރަޝިޔާއިން ބުނެފައިވަނީ އެ ޤައުމުތަކާ ކުރާނެ އެއްވެސް މަޝްވަރާއެއް ނެތްކަމަށާއި އެފަދަ ކައުންސިލަކަށް އެއްވެސް ޚަރަދެއް ކުރަން ބޭނުންނުވާކަމަށެވެ.
ދެވަނަ ބޮޑު ހަނގުރާމައަށްފަހު 1949ވަނަ އަހަރު ވިލާތުގެ ކައުންސިލް އުފައްދާފައިވަނީ ވިލާތުގައި ދިމީޤްރާޠީ ހަމަތަކާއި އިންސާނީ ޙައްޤުތަކާއި ޤާނޫނީ ވެރިކަން ދަމަހައްޓައި ޔަޤީންކުރުމަށެވެ. އެ ކައުންސިލުގައި ވިލާތުގެ އިއްތިޙާދުގެ 27 ޤައުމާއެކު ޖުމުލަ 47 ޤައުމު ތަމުޞީލުކުރެއެވެ.