"ޖަމާޢަތުގެ ޚަބަރުގެ އޮންލައިން" މިނިސްޓަރ އޮފް އެޑިޔުކޭޝަން ޑރ. އައިޝަތު ޢަލީ މިއަދު އިފްތިތާޙް ކޮށްދެއްވައިފިއެވެ.
މިއަދު މި އިފްތިތާހް ކުރެވުނު ވެބްސައިޓް މެދުވެރިކޮށް ތަޢުލީމީ ދާއިރާގެ ޚަބަރާއި، ޢިލްމީ ދިރާސާތަކާއި، އަދި ދާއިރާއާއި ގުޅޭ މުހިއްމު ކަންކަމުގެ މަޢުލޫމާތު ހިމެނޭ ރިޕޯޓްތަކާއި އެހެނިހެން ލިއުންތައް ގެނެސްދޭނެ އެވެ.
އެޑިޔުކޭޝަން މިނިސްޓަރ ޑރ. އައިޝަތު ޢަލީއަކީ ޖަމާޢަތުގެ ޚަބަރު، ވީހާވެސް ގިނަ ބަޔަކާ ހަމަޔަށް ފޯރާނެމަގު ތަނަވަސްކުރެއްވުމުގެ ބޭނުންފުޅުގައި އެމަޖައްލާ އޮންލައިން ކުރުމުގެ މުހިންމުކަން ފާހަގަކުރައްވައި އެކަމަށް ބާރުއަޅުއްވަމުން ގެންދަވާ ބޭފުޅެކެވެ. އެކަމަނާ ވަނީ ކޮވިޑްގެ ވަބާގެ ސަބަބުން ރާއްޖެ ފުރަބަންދުގައި އޮތް ދުވަސްވަރުވެސް ޖަމާޢަތުގެ ޚަބަރު އޮންލައިން ކުރެވޭތޯ މަސައްކަތްތަކެއް ކުރައްވާފައެވެ. އެކަމަނާ ދެކެވަޑައިގެންނެވި ގޮތުގައި ޖަމާޢަތުގެ ޚަބަރުގެ މަގުޞަދު އެންމެ އެދެވޭގޮތުގައި ޙާސިލްކުރުމަށް މަޖައްލާ އޮންލައިންވެގެން ދިއުން މިޒަމާނަށް ނުހަނު ބޭނުމެވެ.
ޖަމާޢަތުގެ ޚަބަރަކީ 1978 ވަނަ އަހަރު ރާއްޖޭގައި ޝާއިއު ކުރަން ފެށި މަޖައްލާއެކެވެ. މިއީ ރާއްޖޭގައި މިހާތަނަށް އެންމެދިގު މުއްދަތެއްގައި ޝާއިޢު ކުރަމުން ގެންދެވިފައިވާ މަޖައްލާއެވެ. އަދި މިހާތަނަށް ރާއްޖޭގެ ހުރިހާ ރަށަކަށް ހިލޭ ފޯރުކޮށްދެމުން ގެންދިޔަ އެންމެ ދުވަސްވީ މަޖައްލާވެސްމެއެވެ. މިމަޖައްލާގެ ފުރަތަމަ މަސްއޫލުފަރާތަކީ އެޑިޔުކޭޝަން ޕްރޮޖެކްޓް އޮފީސްގެ ނަމުގައި ސަރުކާރުން 1976 ވަނަ އަހަރު އުފެއްދި އޮފީހެވެ. ފުރަތަމަ އެޑިޓަރަކީ އޭރު އެއޮފީހުގައި މަސައްކަތް ކުރެއްވި ރާޝިދާ ޔޫސުފްއެވެ.